個市繼續雞毛鴨血，恒指又唔見190點，勉強守住萬三。藍籌沽壓重，唔少一兩個月到期嘅藍籌Call輪，溢價4-5%，槓桿率幾十倍。除非相關正股彈番上去似模似樣，否則呢啲藍籌Call輪風險仍然極高，溢價一縮，輪價隨時下瀉二三十巴仙。市況未定，𠵱家落場炒輪，一定要將注碼縮到細一細，否則好易瞓唔着。
隔晚英美滙市，英鎊兌美元由1.85散落1.80邊邊，噚日港市連1.80都守唔住。英鎊滙價大變，反映喺兩隻滙價窩輪身上。
英鎊兌美元Call輪9628，由26仙碌到20.1仙，跌幅23%，呢隻輪啱睇好英鎊（兌美元）者買入。英鎊兌美元Put輪9632，由28.5仙升上35.5仙，升幅25%，呢隻啱睇淡英鎊（兌美元）者買入。滙價近期波幅厲害，炒滙價輪，時刻富貴與閉翳之間，只係彈指間事，受唔起刺激嘅，最好睇人炒算數，炒嘅話，又要留意買賣唔係咁易，交投始終唔夠熱鬧。
國企指數昨日相當肉酸，跌幅達3.8%，啲中企指數Put輪自然也文也武。例如9423收10.9仙，升30%，打入十大榜，排第3；9424收13.9仙，升25%，排第9。睇吓啲數據，應該感覺好難買得落手。9423今年6月到期，溢價14.2%，槓桿率16.3倍。9424亦係6月到期，溢價更去到20.2%，槓桿率17.2倍。
章盛