港股噚日又大跌190點，險守於13000之上收市。屈指一算，恒指自月初至今已跌884點，累積跌幅唔算細，如果13000呢個心理關口守唔住，後市都幾麻煩。
美股方面有資金流出的情況，港股方面亦見芬佬減持國企股，如果成為趨勢，就算社保基金入市都難以打救港股，惟有希望中央再有挺港新招。
TOMOnline（8282）噚日掛牌，一開市就插水，低見1.33元。阿虎見到包銷商大摩似乎沽貨多過接貨，反觀瑞銀及花旗輪流入市，將股價推回1.39元水平並力守，收報1.40元，但最後都逃唔過破底命運，連累阿媽TOM集團（8001）都大跌10%。
有人將破底責任歸咎於市前交易時段，有手痕友將股價Mark低於1元（阿虎見過0.80元），嚇親捧場客。唔知今次證監會否向有關證券行發警告信呢？
有人話TOMOnline只係生不逢時，遇上美國大跌市。不過，同日上市嘅濰柴動力（2338）逆市做好，較招股價高出28%，反映有實力嘅公司始終受追捧，而互聯網業務的盈利能力始終被人質疑。另方面，由於最近國企股好似有人洗緊倉，相信濰柴升勢唔易維持。
海域集團（1220）噚日股價企得異常硬朗，據聞該公司將到東瀛路演，相信是為公司配股抽水部署。千禧智慧（724）下午停牌，據聞會發新股進行收購，配股價可能有高達20%折讓，不過大家唔使驚，新股唔配出街，應該唔會對股價造成壓力。
阿虎