「名采」作者李登居然有人垂青，將佢嘅專欄作品篩選之後，結集成書，名曰：《你老婆和你是燉蛋》，已經出版上市。左丁山同李登講：「我哋平時寫專欄，讀者睇完就算，出書，有冇銷路㗎。」李登瞪大雙眼，一副肥佬黎教訓夥計嘅口吻：「未試過，你點知唔得？做事要有信心，唔好驚呢樣，驚嗰樣，乜都唔做！」
好，「天地圖書」既然睇起李登，為佢出書，唔通嫌錢腥咩，一定打過算盤。於是拎本書睇吓，弊，拎起就放唔低，睇咗成個鐘頭，幾乎唔記得寫稿㖭。《你老婆和你是燉蛋》所集合嘅文字，全部喺「名采」版出現過，但每日睇完如水過鴨背，笑完之後就唔記得，呢本書就收集埋晒啲精品，左丁山一路睇一路笑，又乘機偷師，唔怪得蔡瀾為佢寫序話：「李登飽讀詩書，又常旅行，見聞很廣，人事物皆以一份赤子之心看之，時而莊嚴，時而詼諧，每一篇都是好文章。」
翻到第一○四頁講「陳果」（香港導演），陳果嘅英文名就係FruitChan，李登話令人一生難忘。陳果之名令左丁山想起中文大學上海校友會會長叫做黃河，英文名就係RiverWong，陳果對黃河，FruitChan對RiverWong都幾絕。李登話為仔女改名，要注意諧音，姓葉不可叫龍基，因為普通話叫成「一籠雞」；左丁山又想起，金耀基又如何呢？普通話諧音係「兼要雞」（差唔多啫，金校長幸勿見怪。）改英文名都要注意廣東話諧音呀，姓廖最好唔好叫做William，否則日日俾人嗌BillLiu，改為Richard重曳，變成DickLiu㖭。