世事嘅嘢，有時候真係好邪。今年股市個勢咁好，睇怕秋官效應都冇發揮餘地嘞啩！真係唔到你唔信，秋官套劇，禮拜一播出，港股就由禮拜二開始，連續大跌3日，跌勢重一日比一日急，恒指夾埋唔見550點。今次秋官舞刀弄劍，好友更加被斬到一頸血，特別係國企股，噚日更出現恐慌拋售，直情世界末日一樣，國企好友呢次真係「血薦軒轅」。
國企指數一度插到落4714，大跌262點，尾段有反彈，但弱勢已成，結果仍跌189點，跌幅3.8%，個別股份則跌6%的最多，家下國企大勢已轉壞，3條平均線都跌穿，下一個位要到4500先有支持。
熱門國企中，最硬淨係中國鋁業（2600），由低位5.65元彈番上5.9元收，僅跌2.4%。中鋁跌得少，主要係宣布大幅加價，由噚日開始，將氧化鋁嘅售價，由每噸3700元人民幣，加到4300元人民幣，幅度係16%。中鋁去年加咗7次價，股價亦升咗幾倍。
講開鋁業，都要提吓間海域集團（1220），呢3日大跌市，佢全然不為所動，噚日重企喺2.775元水平。海域主要生產鋁型材、化工產品同不銹鋼產品，鋁價上升影響唔大，因為材料成本由客戶承擔，海域主要賺嘅係加工費用。
海域係內地鋁材廠五大之一，年產量達8萬噸，近半年來努力擴展，目標係成為三大之一。就喺前日宣布斥資6億元，在佛山三水興建鋁製品廠房，佔地60萬方米，預計年產量逾10萬噸，首階段年底可運作，3年內全面投產。
另正洽購長江三角洲一鋁型材加工廠，年產量亦有10萬噸，現與財顧就細節問題進行研究，若水到渠成，海域將會在一兩年內變身成鋁業巨人，更受基金注視。
去年下半年，海域先後去過日本、新加坡、台灣同歐洲做騷，反應好好；短期內又「徇眾要求」去日本做推介，海域發展得咁快，日本投資者嘅興趣亦愈來愈大。
03年度（12月年結）業績就快宣布，估計每股盈利0.45元，04年度可上升至0.53元，以保守8倍PE計，股價已可見4.2元。
郭兆誠