財爺公布的預算案，一如預期般冇料到，滅赤只能靠經濟增長，而唐司長似乎諗住繼續靠中央出招挺港，刺激香港經濟增長。
黑客話最近歐資出貨，並非因為預咗預算案冇新招，而係因為好多藍籌備兌證就快到期，特別係滙控（005），所以今次港股調整主要係想殺Call輪。
口痕友話，「超人唔衰得，中聯（757）要見一蚊七」。不過，長和同中電（002）所減持嘅20億股將在周五出籠，噚日中聯可以開始沽得，中聯股價即跌至7毫子，重低過配畀長和同中電嘅發行價每股0.80元，口痕友之言果然信唔過。
不過，噚日遇正大跌市，恒指全日大跌183點，收報13214，如此情況下，都好難要求中聯股價可以大翻身。
投資者見到中聯咁插法，日後當電盈（008）配售東燃（432）時，真係唔知搵邊個要貨咯。東燃收報0.71元，大跌21.1%，但仍較配股畀電盈的作價0.18元高好多。
TOMOnline（8282）今日上市，斷估唔會咁快質破招股價1.50元，不過大家千祈咪高追，否則唔知幾時至可以返家鄉。
文傳（343）最近同分析員吹水，話接獲大量飛龍晶片定單，達到2000萬套，成績相當驕人，消息刺激文傳逆市升13.3%，收0.51元，成交增至7300萬元。不過，IBM會否入股文傳，就似乎仍未有下文，但坊間傳出，一旦IBM入股，股價見1元。
阿虎