又係烏雲蓋頂嘅一日，恒指再散183點，今次火種主角係中移動（941），收26.05元，跌幅3.5%，拖低恒指60.8。滙控（005）跌0.8%，只係拖低恒指35.8。恒生（011）有人維持秩序，升1.5元，拉番高恒指9.3。
𠵱家炒輪，風高浪急，眼光若然出錯，就算做即市，埋單都可能輸一二十個巴仙，所以落場注碼，一定要克制。
中移動散落去，炒家好似鯊魚聞到血腥味，撲落隻Put輪9468，結果有84球易手，佔發行量幾乎四分一，高收14.1仙，升幅27%。隻輪7月夠鐘，溢價13.3%，槓桿率18.3倍。另一隻Put輪9519，收30仙，升21%。如果睇淡中移動，賭9519比較實際，隻輪亦係7月到期，溢價8.3%，槓桿率8.7倍，交投較少係缺點。
如果認為中移動會有技術性反彈，咪搞Put輪，可揸Call輪，正路對象係9181同9210。9181輪價18仙，溢價2.9%，槓桿率14.5倍。9210輪價27仙，溢價2.5%，槓桿率9.6倍。兩隻輪下月杪夠鐘，所以溢價唔高。有啲7月以後到期嘅中移動Call輪，槓桿率大好多，但溢價亦高好多，買唔落手。
博大市反彈，亦可諗吓恒指Call輪9282，要有心理準備，恒指一兩日之間分分鐘波動幾百點，睇錯市要畀好高代價。月頭買貨，到𠵱家原來已經水瓜打狗，唔見一半。
章盛