費爵爺到歐冠盃十六強次回合賽前，都冇為首回合誤指波圖門將拜亞扮受傷單嘢，向波圖教練摩連奴道歉，結果波圖和波晉級後，我求大俠淨係見到摩連奴一邊舉起雙手，一邊走入球員通道，心諗佢應該點都要同人握吓手啩。
結果係費爵爺主動搵佢握手，而一啲紅魔球員亦都去波圖更衣室祝賀人哋。摩連奴之後講：「有啲人做過錯事，會專登繼續錯落去。但係當場波結束之後，一切恩怨可以隨住握手之後煙消雲散。」
咁即係話摩連奴已經原諒咗費爵爺，之但係佢亦要明白，以費爵爺嘅地位同性格，係幾難向人賠罪，心水再清啲嘅話，其實費爵爺主動同你Friend，已經代表咗佢已經向你道咗歉。
除李斯特城外，布力般亦喺西班牙集訓時出事。話說佢哋嘅球員祖軒遜同班想搶佢手提電話嘅賊仔發生爭執，差啲釀成流血事件，領隊桑拿士之後，就即刻下令禁止出外集訓，寧留喺英格蘭練習。聽落桑拿士好似好專制，但我求大俠就贊成佢咁做，起碼可以阻止不愉快事件發生。
樸茨茅夫日前講到明，若然下屆佢哋留唔到喺超聯，收入就會少一大截，所以亦唔會同季尾約滿兼高薪嘅史東、舒活同舒寧咸續約。我求大俠覺得老樸高招，擺明就叫佢哋如想攞新合約嘅話，就要搏命啲。但舒活因斷腳而提早收咧，佢想繼續留隊，睇嚟要靠史東同舒寧咸啦。
國足改戰緬甸場友賽最後因為時間太迫關係，廣州主辦單位趕唔切搞，結果場波由收費A級賽事，可能更改訓練基地踢啲普通練習賽，而阿漢里亦不停將備戰計劃改動。有內地傳媒透露，阿里漢咁做，係要防備已經到咗大陸刺探軍情之港隊「探子」喎，認真小心。
爵士原本計劃為效力咗十八年嘅馬龍鑄造一尊銅像，永久屹立喺主場館外，好似佐敦嘅銅像屹立喺公牛主場館外一樣。但係「郵差」最近同舊隊關係愈鬥愈薑，嬲到唔鬼去度身。爵士班主拉利米拿更還以顏色，話馬龍唔嚟重好，佢可以慳番造銅像嗰二十五萬美金。