財爺唐英年，遭受安民當面窒一窒之後，喺立會小心翼翼讀出佢第一份預算案，十足新抱斟茶咁，姿態方正，相信冇去議事堂坐鎮嘅唐爸爸都會心花怒放。
人人都知道唐媽媽處處為個仔着想，原來佢老竇唐翔千一樣望子成龍，呢位八十二高齡嘅老人家日前接受報紙訪問，竟然好坦白咁話，好鼓勵個仔朝住特首嘅目標前進，佢嘅心願係希望唐英年「為人民服務」，如果佢得到港人擁護，又能作出貢獻，佢老人家就好開心喇。
有父母如此，唐唐只好向前衝。唐老先生都好識得幫個仔拉票造勢，好似佢講到唐唐阿爺唐君遠，就不忘講吓七十年代末，祖籍無錫嘅唐家如何組成愛國投資公司，回國投資，唐翔千重聽老竇話，七九年已然喺深圳新疆設紡織廠，呢啲紅色背景，遇着𠵱家時興愛國情懷就十分啱使，唐爸爸捧埋佢老竇當年送畀佢嘅結婚禮物─《毛澤東選集》出嚟畀記者睇，咁樣騷「哥利」法，梁振英好接招嘞。
（圖）唐英年老父唐翔千好坦白咁話希望個仔得到港人擁護。
傳真︰2623-9278
電郵︰