章小蕙因兒子鍾嘉浚的學費一事，與前夫鍾鎮濤（阿B）各執一詞，隔空互罵。昨日罵戰升級，章小蕙力數阿B不是，更指他「撩人者賤，食錯嘢，講嘢語無倫次」；阿B則指有「癲狗亂咁吠」，不願再回應。
章小蕙早前被本報揭發拖欠兒子鍾嘉浚美國軍校學費，要分期支付，其前夫鍾鎮濤指她送子放洋讀書是一意孤行，又謂有人放料令他遭狗仔隊跟蹤，女友范姜素貞公司的信件亦告失竊。
章小蕙昨日在中環時裝店反擊阿Ｂ的指摘，她說：「娛樂圈知名人士俾狗仔隊跟係天經地義，佢唔係第一日入行，佢姓賴㗎？定佢食錯嘢，講嘢語無倫次？范小姐（按：范姜素貞複姓范姜）星期一重打電話畀我，問我點解叫狗仔隊跟佢。喂，我都日日全天候俾人跟，我賴得邊個？狗仔隊要做你古仔，關我乜事？」章小蕙自言忙於拍拖，沒興趣理會娛樂圈新聞。
提到阿Ｂ指有人為非作歹，章小蕙說：「為非作歹係佢自己先，我冇做過，要做都七年前離婚時做啦，呢個真係fatalattraction（孽緣）。成件事係撩人者賤，係邊個喺度撩是鬥非，搬個仔嚟攻擊我？」章小蕙強調幾萬美元是外國留學的基本學費，更謂堅持把兒子放洋有原因，她說：「我想佢青春期喺冇污染環境成長，佢哋（指阿Ｂ）嗰度成日開通宵party，開到朝早六點啲仔女先有得瞓。兩年前，個仔已經被人教到識飲一杯紅酒，我唔想佢習染到爹哋嘅不良嗜好！」
章小蕙又表示平日星期一至四，女兒鍾嘉湄由自己司機接送，但周一晚阿Ｂ故意不將女兒送返她家，家傭致電鍾家查詢時更被指搭錯線，她說：「我認同係有人刻意營造湊女返學嘅情況。」
而對范姜公司信件失竊一事，章小蕙則回應說：「佢女友有公司，我都係𠵱家先知，唔該范小姐唔好指桑罵槐，請佢哋好自為之。」
對於前妻的指摘，阿Ｂ昨日說：「講得出唔代表就係事實，要睇係乜嘢人講。我噚日重諗緊自己明知俾人整蠱，係咪要坐喺度任人玩呢？點知今日行街，喺街度見到有隻癲狗亂咁吠，正常人都唔會行埋去，我就知道應該點做。我唔想同啲是非糾纏落去，人哋再講乜都好，我唔會再浪費時間去回應。」
採訪：梁錦雯、蔡如育
