李柱銘出席國會聽證會，指證廢董胡作非為，蔣彥永醫生向美國《時代》周刊報料，指證中國隱瞞沙士嘅劣行，兩大「漢奸」，將來一定喺史上留下英名。
不過，喺啲土共猛力炮火轟擊安民鞭屍大攻勢之下，一啲中產階級分子，理性訓練唔夠，開始有少少動搖，連有啲學者都話：李柱銘可以去美國，可以見《時代》周刊一類嘅傳媒，因為傳媒唔代表官方，但唔應該去美國國會呢亭「官方機構」，夾硬落中國面。
《時代》周刊嘅「級別」，就低過國會？真係好笑。一個先進嘅民主社會如美國，報刊傳媒，被稱為「第四權」（TheFourthEstate），即是與行政、立法、司法平起平坐嘅權力單位，美國總統尼克遜，就係遭到《華盛頓郵報》所隊冧下台，見美國傳媒，喺好多親中文人眼中，有「國際新聞霸權」之稱，殺傷力隨時重大過出席國會聽證會。若然當日美國國會舉行一場「中國沙士內情聽證會」，邀請蔣彥永醫生出席，唔通蔣醫生一去，就係「賣國」，哦，同《時代》周刊記者洩露「國家機密」，就反為係「愛國」？可見有啲受過西方教育嘅中產階級人士，喺面臨土共炮火嘅時候，定力都重未係好夠。
李柱銘搭飛機去美國國會出席聽證就係「漢奸」，咁若果美國國會移磡就船，自己飛嚟香港聽證，咁喺香港見美國國會，又算唔算「漢奸」？正如上門光顧一鳳樓，同埋打電話叫北姑上自己間房，一樣都係指壓按摩，有乜分別，又的確幾考起人。
曾鈺成亦曾經話過，佢好想去白宮見總統布殊。上次收唔到美國國會請帖出席聽證嘅，例如工聯會，唔使咁傷心，現時有一個補救民族自尊心嘅天大好消息，就係美國國會見到香港有咁多親中土共人士眼紅嫉妒阿「媽田」，覺得阿「媽田」有得借見國會而入到白宮見埋鮑威爾，自己冇得見，口中瘋狂謾罵，心中猛流口水，國會徇眾要求，為免歧視起見，決定正式根據美國國會嘅「香港政策法」，派名下嘅「美中經濟及安全審議委員會」五名委員，下周來港，同特區嘅親中土共人。
話明「保安」喎，重要係依據「香港政策法」嘅美國法例而來，重唔係赤裸裸「干預中國內政」？若然呢個美國國會委員會，嚟到香港，要召見廢董，咁廢董係咪應該去應召，做唔做漢奸好呢？若然唔做，堅持民族立場，即是唔畀面美國，咁美國國會議員一怒之下（一定要假設美國佬同中國人一樣咁小器），佢哋萬一要求美國政府，取消晒廢董啲子子孫孫嘅美國籍，咪豈不是好大鑊？
做「漢奸」，即是有國際地位咁解，連成龍都爭住做，打入荷李活，做拖住條清辮嘅諧趣角色，酬勞係二千萬美元。美國國會萬分體貼，為感謝董建華放小鷹號美國水兵入關，今次畀一個機會大家，人人可以做漢奸，好上啦，咪畀李柱銘一個人壟斷晒，做咗「漢奸王」呀。
傳真︰2623-9278
電郵︰