喻為建築界「奧斯卡」嘅國際房地產交易會（MIPIM），係全球建築界盛事，若果物業攞到獎，就肯定身價大升啦！能夠擊敗對手，獲得提名，都已經好唔簡單。
喺法國舉行嘅「第十五屆國際房地產交易會」，有十五項建築物獲得提名。香港有幸佔一項，淺水灣道117號GrosvenorPlace，係住宅類別中，三個角逐呢個「全球最佳住宅物業」大獎嘅項目之一。可唔可以獲獎，禮拜五就揭盅。
GrosvenorPlace係泛海集團與AyalaInternational合作發展，計劃今年開賣，意向呎價萬八。
GrosvenorAsia董事經理陸智德話，項目融合時尚同經典風格，因此能夠喺全球幾千個參賽住宅項目中脫穎而出，令香港成為全球建築界焦點。
個項目由倫敦建築師PaulDavis設計。佢話，要設計出兼具視覺同商業吸引力，係呢項設計工作嘅最大挑戰。
咁同GrosvenorPlace角逐嘅係乜嘢建築物？係荷蘭ArmadaHousing同埋德國ArkadienAsperg。
馬鞍山鐵路即將落成，區內工貿物業即獲追捧。
其中小瀝源匯貿中心一個銀主盤，最近以暗標放售，竟然吸引到十五家公司競投！
最終由一名出入口貿易商人，以高出開價近一成三奪得。
中原張志傑透露，個高層相連單位，一六二三呎，銀主開價一百一十六萬。標售兩日以來，共收到十五份標書，終以一百三十萬五千成交。新買家打算自用。
張志傑話，馬鐵效應，帶旺小瀝源工貿交投，呎價已重返98年水平。今次競投之烈，多年少見。
買樓置業，買家一般都要搵銀行造按揭，通常畀成交價三成做首期，其餘向銀行借，但近月樓價升得太急，𠵱家已經冇呢支歌仔唱。
銀行為咗降低風險，唔肯借咁多，聽講大約係成交價打個八五折做估價，再按呢個價借出七成，買家最後只借到成交價嘅六成。由於借唔足嘅情況愈嚟愈普遍，所以好多買家入市時都有晒心理準備，要抬多啲錢至可以上到會。所以較少發生因為唔夠錢，搞到上唔到會。
歌星同模特兒都會畀人神秘嘅感覺，好多人好恨入呢行。𠵱家有機會嘞，長實紅磡都會商場，與廣州電視台合作，舉辦都會商場「2004粵港歌唱大賽」及「模特兒新星大賽」，畀港粵兩地市民參加。
兩組比賽都設冠亞季三個獎項，勝出者除咗攞到總值過萬現金獎，重可以獲得藝人試音合約，或試鏡合約一份。即係話，可以搖身一變，成為明日之星嘞，明星夢隨時有機會夢想成真。
𠵱家接受報名，4月6號截止。初賽喺4月同5月舉行，決賽就係5月底6月初。當然，呢個比賽最大得益者，應該係商場租戶，因為人氣大增。
自從中半山富匯豪庭、港景別墅，出現每呎一萬七千元高價成交後，港島豪宅造價，日日有驚喜。
噚日中半山雅賓利，就傳出有全層，以每呎二萬成交，簡直係天價！
今次傳出創紀錄成交嘅，係雅賓利三十六樓全層，相連三複式單位，面積六八三○呎，連空中花園，計落成交價要一億三千六百六十萬。
呢個消息對豪宅市場真係「火上加油」。蘭西第一時間打畀發展商太古求證，𠳔哋話，如果有咁高呎價成交，重唔第一時間對外公布，佢重否認樓盤有全層單位賣出㖭。
原來係流料，𠵱家豪宅市道咁熾熱，奉勸買家要小心，因為流料滿天飛，好易中招。
蘭西
電郵地址：
