劉德華、張學友、劉青雲、吳鎮宇、任達華、劉嘉玲、吳君如、張栢芝同林嘉欣，都係今年「第二十三屆香港電影金像獎」最佳男、女主角嘅候選人馬，呢班準影帝影后，最近雲集為「香港電影金像獎200頁精裝版特刊」拍咗輯雙封面相，由香港著名攝影師夏永康親自操刀拍攝。
每年奧斯卡金像獎都會搵班候選人影輯相，估唔到香港金像獎班友都嚟呢招，不過單係睇封面，班星都有一定號召力，呢本場刊全球發行二萬本，公開發售，同以前只係場內派有啲唔同，起碼冇份睇頒獎禮嘅影迷都有機會買本嚟收藏。
場刊入面會有兩個專輯，一個係回顧過去金像獎歷史，另一個係探討港產片同中國電影嘅緊密關係，亦都訪問咗梁朝偉、張曼玉、劉德華同吳思遠一班對電影有貢獻嘅工作者。
王力宏同台灣天后張惠妹早前傳緋聞，不過佢哋一直只認係好朋友。近日有人目睹佢哋拍拖一齊去睇陳凱歌嘅電影《和你在一起》。記者致電嗰日有份同行嘅台灣主持人黑人，黑人話係自己約佢哋睇戲。其實除咗睇戲外，王力宏同阿妹都鍾意睇同打籃球，所以話培養出感情都唔出奇。
任賢齊噚日喺港台接受訪問時大講舊事，原來佢二十歲嗰時喺台灣做過救生員，佢話有次有個化濃妝嘅三十幾歲有錢女人，好主動想小齊做佢嘅小男人，咁即係個女人想包起小齊啦！不過小齊覺得男人要活得有尊嚴，所以佢都冇後悔當時冇接受個富婆嘅要求。
關心妍被無綫封殺，重禍及同公司嘅呂方同傅珮嘉，噚日無綫開會，初步暫定關心妍違約「罪名成立」，喺未來呢三個月都唔使亮相無綫，實行殺一儆百。不過無綫就覺得一單還一單，不應拖埋呂方同傅珮嘉落水，所以放生佢哋，馮仁昭覺得無綫都算係咁，因為揸正嚟做嘅話，無綫直情可以出律師信告關心妍違約，所以呢次都只係小懲大戒。
張佩金早前喺上海發生車禍，𠵱家重喺上海嘅醫院留醫，佢經理人兼男友Harry噚日喺長途電話度話：「佢都冇乜嘢，不過早兩日發燒，好彩目前退咗燒，醫生話係正常反應。」醫生因為擔心佢哋交叉感染，所以唔准佢哋見面，Harry重話𠵱家同醫生爭取緊同張佩金見面。
張文慈噚日喺亞視總台出席「三月生日會」，原來最近佢同亞視簽咗兩年合約，佢話：「我自己本身都好鍾意拍電視劇，遲啲《我和殭屍有個約會III》又開拍。」問到佢今次回巢亞視的酬勞時，佢笑笑口話：「都好滿意，咁一定比以前多。」
張達明噚日接受電台電話訪問，講到即將舉行嘅棟篤笑，佢話：「今次會玩雜技，重會挑戰命運，觀眾重可以攞我條命！」達明又話佢太太已經懷孕五個月，達明𠵱家每日過住啲好有紀律嘅生活，朝早起身會陪下囝囝讀書，然後就開始閉關同排戲。
