人唔傷心唔流淚，噚日係小初見到經紀陳哭股喪，喊得最淒涼嘅一次。所謂福無重至，禍不單行，早兩日佢衰手痕，亂炒東方燃氣（432）損手，噚日就因為中聯系統（757）配售股份即將出籠，股價大插水受重創。
小初唔明，以經紀陳縱橫股市咁多年，竟然犯下如此大錯，實令小初百思不得其解？經紀陳話，佢估唔到超人父子效應咁短癮，雖然自己因手多輸錢，理應與人無尤，但連續兩鋪都係輸畀同一家人，個心難免不忿。
雖然經紀陳連番輸在超人父子手上，但小初今日咁啱又係推介超人系內嘅和記港陸（715）。
和記港陸即將在3月16日，即係下周二公布全年業績，和記港陸上次公布截至去年6月底中期業績時，盈利上升40%，跟住公司話幫和黃（013）生產3G配件，又話代理華納品牌，有咁多嘢搞，斷估下周業績開嚟見人，唔會太差。
和記港陸噚日跟隨大市下跌，挫2.4%，收0.81元，成交股數有1415.6萬股，金額1151萬元。
慕容小初