劉嘉玲前晚出席新片《七年很癢》首映，近日有報道指關之琳為了避嘉玲而簽約瑪花纖體，而因為二人形象近似，故有搶工作之嫌，但嘉玲就否認二人不咬弦，她又大讚之之很「索」。
劉嘉玲、劉青雲及郭藹明夫婦、應采兒和中國星老闆向華強夫婦等，前晚在尖沙嘴出席新片《七年很癢》首映。
嘉玲前晚穿上紅色高貴晚裝到場，問到嘉玲有何方法避免七年之癢，她說：「我會充實自己，我都好欣賞自己嘅內涵。」有報道指關之琳為了避嘉玲而簽約瑪花纖體，而由於她們兩人形象近似，似有互搶工作之嫌，問嘉玲是否與之之不咬弦，嘉玲說：「梗係唔係，佢住喺我樓上，呢行邊有話搶工作，每個人都有自己形象，之之比較溫柔，我就男仔頭。」問嘉玲覺得自己和之之的纖體廣告，哪個較「索」？嘉玲說：「梗係你哋話，不過，之之喺我心目中都好索。」
近日有報道指李連杰計劃出家，向太即代為否認：「我都有同杰仔傾過電話，好搞笑，杰仔邊有可能出家做和尚，佢有妻有女，佢𠵱家有兩個女，大女三歲幾，細女都一歲。佢話喺內地有幅地皮，其中二十分之十九賣畀和黃起樓，自己剩番嗰啲都可以起十間房，佢重話會留間總統套房畀我，可能喺美國住得耐，想返自己家鄉住吓。」對導演方平曾指杰仔沉迷搓麻雀，向太說：「嗰次杰仔返嚟，俾寶珠同袁和平捉住打台灣牌，佢唔熟咪輸咗少少錢。」
此外，劉青雲笑言今次是帶太太郭藹明看首映順便過電檢，郭藹明表示明白青雲拍情慾戲是為劇情，故事前不需要向她特別知會。而有消息指應采兒因跟向展平分手，所以現時工作量少了，應采兒說：「我哋有一齊過，我哋係好朋友，返到嚟香港先認識。」
採訪：陳梅香 攝影：陳烱威
