前滙點主席張炳良早幾日先由新加坡講完學返港，佢話雖然人不在港，都有人將劉迺強瘋狂抹黑「媽田」嘅文章傳畀佢睇。
張炳良話，劉迺強七十年代喺港大都有做過佢導師，當年大家都反霸權、反美帝，講馬列，思想左傾，可謂志同道合，贊成民主回歸，劉迺強重係做滙點第一任主席。九三年張炳良做主席嘅時候，大家又因對是否支持肥彭政改方案意見分歧，最後佢、王卓祺同曾澍基退出滙點。
大家有不同意見，離離合合，張炳良話冇問題，但係劉迺強最近同民主派紮晒馬，對媽田嘅問題無限上綱，寫文章又尖酸，張炳良就話冇必要。
佢覺得劉既然同民主派人士過去有交往，𠵱家又得到中央信任做政協，就應該扮演一個溝通兩方嘅角色，而唔係中央開綠燈砌人，你就咁啱出手。
有人形容劉迺強係滙點嘅污點，張炳良就不回應，搞成咁，重有乜好講。
傳真︰2623-9278
電郵︰