唐唐噚日喺立法會拋出一項新嘅車胎稅，立法會議員李卓人即刻對號入座，話歡迎唐唐回收佢條三十七吋嘅車胎，當然阿人係講緊佢個私家士啤胎，佢話，Henry（唐唐洋名）咁瘦，有大把本錢接收。
阿人都有自知之明，知道自己同馮檢基一樣，實在要纖體瘦身，佢話喺八九六四之前，佢條腰只有三十三吋，加上最近去美國，鋸咗兩日牛扒，𠵱家就膨脹咗四吋，今日儲定卡路里，第日入到秦城監獄都有排消耗。阿人重話回復到三十三已經好滿足。
八方問阿人係咪食得太好，搞到一百七十八磅，破晒自己紀錄？佢話都係運動太少，重講笑話公開徵求做纖體代言人。唔講唔知，阿人後生個陣，條腰只有二十八吋，𠵱家要減到咁fit就好難囉。
（圖）唐唐話提出徵收車胎稅，李卓人（中）即刻玩嘢，歡迎唐唐回收佢條三十七吋士啤胎。
傳真︰2623-9278
電郵︰