甄子丹大前晚同古天樂為電影《戀情告急》趕工，佢哋喺一間餐廳拍一場為梁詠琪（GiGi）而爭風呷醋嘅場面時，古仔跳起時因用力過度，左手打中咗一盞吊燈，盞燈爆咗事小，古仔隻手插傷咗就事大，工作人員於是即刻送佢入院縫針。
噚日馮仁昭打畀古仔，佢話：「如果唔係整傷隻手，噚日都冇可能有一日假期休息，呢輪日日都係咁拍，可能唔夠精神先會整傷，𠵱家縫咗四針，冇乜事啦！」
而前晚GiGi就同甄子丹喺海逸酒店總統套房拍一場求婚戲，喺戲入面精於彈鋼琴嘅鑽石王老五甄子丹用咗一隻五卡嘅鑽戒同佢求婚，GiGi話：「如果有人用五卡鑽戒同我求婚，又彈鋼琴畀我聽，咁浪漫，想唔應承佢都唔得啦！」
身為全國政協嘅汪明荃，前日喺北京自爆俾無綫減至一個月四個騷，擔心下個被炒可能係自己。不過，無綫高層樂易玲同馮仁昭講，話阿姐有排先至約滿，大家重未傾續約細節，又何來減騷？佢相信阿姐係過份憂慮，所以打算喺阿姐返香港之後好好同佢溝通吓。
梁家仁噚日俾一名業餘女編劇謝雪蓉指其拖欠劇本費，入稟小額錢債審裁處追討欠款。女編劇表示舊年同梁家仁達成口頭協議，替對方撰寫電影《盜秦墓》劇本，酬勞一萬五千元，但梁家仁只付一千元定金，收到劇本後未付分毫。梁家仁噚日缺席聆訊，裁判官判其敗訴，需支付約一半稿酬逾七千元欠款。
案件編號：SCTC6286/04
最近有人寫匿名信到報館，話賭王何鴻燊嘅大婆黎婉華過咗身後，二姨太同四姨太就係咁爭股份同物業。賭王噚日喺信德出現時話：「我一生人收過無數匿名信，有本事就講自己係邊個，我唔會理，丟晒落廢字簍。」問佢內容係咪真實，賭王即時好勞氣咁話：「垃圾！」佢又話兩位姨太相處融洽。
譚耀文結咗婚後，近日正式投入工作，佢接拍咗無綫一套新劇，飾演卧底，噚日阿譚喺將軍澳電視廣播城宣傳套劇，見佢身形有啲發福，而且雙耳重戴咗助聽器，阿譚話：「個病係有遺傳，𠵱家太低音嘅聲，我會聽唔到，有時溝通上都會有影響，但少少缺憾唔緊要啦。」
