英格蘭足總盃四強喺前日抽咗籤，結果阿仙奴同曼聯唔能夠避開對方，要喺準決賽就硬撼。其實，唔單止係球迷，連賭波公司見到咁嘅戲碼都牙痛咁聲。佢哋話如果「兵工廠」同「紅魔鬼」喺決賽先至相遇，預料極可能可以打破英格蘭足總盃嘅投注紀錄；而且，佢哋亦怕打完準決賽之後，由於決賽嘅戲碼大減（因為另一場係甲組新特蘭對甲組嘅米禾爾或者乙組嘅燦美爾），會令到投注額大跌。
我求大俠都覺得啲賭波公司講得有道理，不過，我就懷疑佢哋咁唔開心嘅另外一個原因，就係怕好似新特蘭、米禾爾或者燦美爾捧盃。因為呢啲球隊當初嘅奪標賠率好冷，如果順利捧盃，賭波公司都要賠唔少㗎！
保頓中場奧高查早排遠赴突尼西亞，為尼日利亞踢非洲國家盃，最後佢唔單止幫球隊攞咗個第三名，自己重當選埋最佳球員；或者係太過搏命關係，佢自己亦承認返到英格蘭後好攰，影響咗佢喺保頓嘅演出。啲球會領隊好似雲格及費格遜咁，反對旗下嘅國腳級球員踢國際賽，大家終於明點解啦。
𠵱家喺意甲打緊護級戰嘅佩魯賈，禮拜對烏甸尼斯時因門將卡歷犯錯，搞到唔見咗兩分；佢哋會長加奧斯賽後狂插卡歷，重叫教練哥斯美棄用佢，但哥斯美明顯當加奧斯冇到，兼且話門將偶爾犯錯好正常。排陣應該係由教練決定，唔理啱定錯，會長都唔應該插手，今次加奧斯真係攞架嚟丟。
連續四場對啲葡超中下游球隊都贏唔到嘅博維斯塔，終於忍唔住炒咗玻利維亞名將、現教頭艾雲山齊士，由柏查高回巢領軍。又係嘅，作為傳統強隊之一嘅博維斯塔𠵱家跌到第七，禮拜六重要同波圖踢同市打吡大戰，換一換個頭頭，博有新氣象，可以同波圖鍊吓，否則再失分，真係邊度都唔使去。