理大校長潘宗光博士呢個星期日起，逢非賽馬日嘅下晝四至五點，會喺港台第一台節目《東方三博士》同浸大嘅麥勁生博士開咪，介紹香港嘅發明同研究。
雖然第一次做節目，潘宗光冇乜食螺絲，港台搵佢嘅時候，佢只係考慮有冇角色衝突，冇就OK。「唔係外國嘅月亮就特別圓，香港嘅月亮都好圓。」潘宗光一直以理大獲歐洲太空總署指定負責做太空鉗感到自豪，第一集介紹完科大關繼祖博士嘅防止病毒散播裝置之後，就到理大容啟良教授登場。
大學最近被削資困擾，潘宗光話只係識sayno冇用，亦要現實一啲。理大今年籌到兩億，好多人都俾自稱乞兒嘅潘校長打到心口腫晒，大學都要諗吓另開新水喉。佢重話，理工有一個外籍老師因拒絕接受○三三減薪方案，拒絕繼續「愛港」，毅然決定三月底離職。
潘宗光都做過立法局議員，佢認為目前嘅愛國文革大風暴，係茶杯風波，只有一小撮人喺度玩，毋須太過理會，各人做番自己嘢就得。嘩，果然係學佛之人，潘校長呢一招「八風不動」，好有道行喎。
傳真︰2623-9278
電郵︰