赤柱豪宅富豪海灣廣告宣傳策略都幾獨特。去年9月開賣時，撞啱市道麻麻，宣傳欠奉。到咗年底，個市開始郁，發展商先至同無綫合作，間接幫個盤做宣傳，搵最當紅嘅歌星喺樓盤拍音樂劇，無綫負責製作，發展商主要負責提供場地。
到近排，個市旺到不得了，富豪海灣熱賣到發展商幾乎叫停。一系列文字同電視廣告，喺呢個時候排山倒海出街。其中電視廣告，重金禮聘陳慧琳同方中信兩個紅人孭飛，保守估計，佢哋廣告身價以幾百萬計。
今次發展商出錢又出力，不過就講明，花幾百萬去拍廣告，並唔係為咗銷情，只不過想提升樓盤嘅形象，令買咗嘅安心；未買嘅大可放心去買。呢招以退為進，講到尾，咪又係硬銷個盤。廣告會喺下個月出街。
另外，拍到第三輯嘅富豪海灣電視音樂劇，同期喺下個月3號首播。今次有份拍嘅，有容祖兒、男子組合Boyz同任賢齊。
