章小蕙近日因無力繳付兒子鍾嘉浚的六萬元學費，要求校方准許分期付款。對此，章小蕙昨日指分期付款十分普遍，並直斥鍾鎮濤（阿B）沒有幫手負擔之餘，還借兒子學費的問題宣傳新碟。而阿B則與范姜同湊愛女返學，以闢分手傳聞。
雖然章小蕙財政緊絀，無力付愛兒學費，但她繼續夜蒲，前晚十一時多，與一名年約四十歲的華裔男伴離開中環KeeClub，兩人有傾有講，談笑風生。及至昨日下午，章小蕙又與一中年男士在鏞記門前閒談，再在中環店接受訪問。
對於外間指她生活奢華，章小蕙反應極大說：「你理得我啫！我覺得分期付款唔係醜事，我唔識印銀紙，但我一個人做四、五份工，只係冇能力一次過畀晒幾萬。作為媽咪，我只係想喺我能力範圍畀最好啲仔女。」章小蕙又說：「我追佢（指阿Ｂ）係冇錯，佢畀開每個月七千蚊學費，𠵱家個仔轉校，佢冇畀錢我接受，點解我唔出聲處理咗就錯？我覺得佢出唱片博宣傳，出碟唔講碟，反而講家事，講細路仔，咁樣攻擊我。嗰仔十四歲有自尊心，唔好攞呢啲嚟講。」
昨日有雜誌報道指鍾鎮濤女友范姜懷孕三個月，阿Ｂ更因而與女友鬧分手。但昨晨七時多，兩人離開寶雲道寓所，如常拖着女兒鍾嘉湄返學，到達學校後，阿Ｂ更為女兒揹書包，盡顯父愛。
阿B對被指博宣傳反擊說：「我本來天下太平，但近日俾狗仔隊跟蹤，可能因金錢問題俾人整蠱。」阿B又透露范姜近日信件多次被偷，更謂對失竊心中有數，似有所指章小蕙。
而阿Ｂ否認女友懷孕及鬧分手，他說：「其實我哋都俾狗仔隊跟咗幾日，佢哋明明噚日先影到我同女友一齊，今日就話分手，特登唔登我同女友一齊嘅相嚟自圓其說，可以話係笑料一則。」
採訪：蔡如育、駱華齡、梁錦雯、娛樂突發組
攝影：梁錦雯、娛樂突發組
