澳門發展商將路環六十萬方呎地皮，喺港澳兩地招標。
唔知渴地好耐嘅香港發展商，會唔會連澳門地皮都照買呢？嗰啲喺澳門有唔少投資嘅香港上市公司，好似信德集團與九龍建業等，係咪會興趣大啲呢？
代理仲量聯行話，呢幅地皮喺路環田畔街東南面（見圖），鄰近工業區。城市規劃可以起住宅，但係發展內容，要視乎同澳門特別行政區政府最終協議而定。
既然係港澳兩地招標，所以喺兩地都會設點，畀有興趣人士入標。截標日期係4月7日。
呢幅路環地皮，位置較遍遠。究竟值幾多錢，大家可以參考，澳門政府上個月推出林茂塘填海地。一萬零七百幾方呎，以高出開價三倍，六千七百二十九萬澳門元賣出，成本呎價近九百，比同區呎價七八百元略高。
澳門住宅喺十幾年前曾經好興旺，當年唔少港人過江炒澳門樓。後尾市道逆轉，好多損手收場。
但係，十年人事幾番新，今時今日，澳門經濟重好過香港，當地樓市係咪可以睇高一線呢？
停咗三年之後，中原地產下個禮拜再舉辦「中原之友」茶敍，邀請曾經喺中記做過嘅舊同事出席。施老闆重會就地產從業員前景進入新一個高潮為題，發表講話。
咁即係話做地產代理嘅黃金日子重臨。
喺中記做過嘅員工有萬幾人，𠵱家重做緊嘅就有千幾人。
中記計劃只聯絡嗰啲做咗起碼半年以上嘅員工，出席呢次活動。
代理行人手好短缺，唔知施老闆係咪趁呢個機會，順便睇吓有冇舊同事肯回巢呢？
利嘉閣又有新分行，今次竟然係洗衣店，唔通利記兼營副業？
噚日開張荃灣海濱花園舖，花牌擺滿舖位兩旁。藍底白字招牌嘅利記，同毗鄰大白兔洗衣店夾埋，好似係一間店舖，睇落好似利記洗衣店開張。
講開開舖，利記今年計劃將分行擴至一百間，𠵱家已經有近七十間，下嗰禮拜，九龍區重會連開三舖。
開咁多舖，市場可唔可以承受到？利記執行董事廖偉強話，因發展商惜貨，預期3月一手成交會縮，但買家轉向二手，令二手成交增兩成，聽落淨係做二手都夠嘞。
香港置業早前請嚟律師，為前線代理講解，做「摸貨」嘅法律知識。
母公司美聯物業，就開辦「二手樓花買賣課程」，重由九龍區董事羅國安親自上陣教授㖭。
近期樓花轉賣情況愈嚟愈熾熱，呢個課程啱晒啲前線代理，唔怪得反應咁踴躍啦！
羅國安曾經執過教鞭，但自97之後都好少開班講課。
蘭西
電郵地址：