雷諾Modus今年秋季登場

近年狀態大勇嘅法國雷諾汽車（Renault），喺今屆瑞士日內瓦車展上展出咗多款新車，當中包括以概念開篷跑形象示人嘅Wind以及MeganeⅡRS等等，全都惹來車迷注視；原來場館另一角，重有一款可望於今年秋季登場嘅Modus！

記者：鄭達基

掀背流線車
據廠方公布嘅新聞稿中指出，以掀背車形式出現嘅Modus，其尺碼會與現行Clio車系相近，但賣相卻要來得更Cutie、更富年輕活力感；首先，廠方特別為其設計出一個圓潤而流暢嘅車身線條，一組設計獨特嘅頭燈襯上全新家族式鬼面罩，加埋四輪新款17吋跑車合金胎軨組合，望落好有跑味！

天幕式車頂
廠方刻意為Modus營造出一個寬敞闊落嘅車廂空間，匹配承托力甚豐嘅座椅，坐落妥貼又舒適，當然唔少得重有齊全嘅車廂配備啦！不過全車最吸引嘅地方，實非以天幕式出現嘅玻璃車頂莫屬，不但能令車廂變得開揚外，而且重可以讓車上乘客有更多親近大自然嘅機會。
咁重唔止呀！車上座椅鋪排又有靈活多變嘅特性，而尾門更可按不同需要作唔同程度嘅開啟模式，方便提存儲於尾廂嘅物件，雖然1.6公升引擎及115匹馬力未算突出，但仍是一部令人期待的代步車。