胡應湘近日喺北京親自點名四人：財政司司長唐英年、機管局主席馮國經、九倉主席吳光正，以及政務司司長曾蔭權，話佢哋有資格做下屆特首，惟獨冇咗近期好高調嘅大熱人選梁振英。八方噚日見到已經返咗香港嘅哥頓，梗係要問吓點解，佢就好玄妙咁話：「我諗冇乜人鍾意欽點。」
哥頓冇話CY梁是否中央欽點，但個勢擺出來就俾人有啲咁嘅感覺。大家都有眼睇，前日政府新聞處煞有介事咁出咗份新聞稿，回應鄭經翰話梁振英身為行會人員，高調謾罵劉慧卿「支持台獨」，係不負責任地違背行政會議傳統，認為CY梁咁做有其個人不可告人嘅政治目的。新聞處就引述政府發言人話：「並無任何規定行政會議成員不能提出或參與公開辯論公眾關心的事務。」咁廢董政府嘅「集體問責制」、「團隊精神」係乜？呢次已經唔係第一次由新聞處發稿回應傳媒講CY梁嘅嘢，睇嚟梁生好在意人哋點話佢，各方不妨放長雙眼昅住呢位紅人動向。
傳真︰2623-9278
電郵︰