股壇瀏覽器:中芯濰柴基金客多

股壇瀏覽器:中芯濰柴基金客多

港股噚日成交不足150億元,午市出現稍為大些少嘅歐洲沽盤即刻頂唔順,恒指大跌176點,收報13397,地產股沽壓較大,新地(016)跌2.3%。
不過,噚日收市後,即傳出國內社保基金已流入港股,唔通阿董所講嘅「好消息陸續有來」開始逐一兌現?坊間話中央挺港,係為咗幫親中派在立法會選舉中拉票,以免民主派大勝,如果傳言屬實,香港應該將4年一次嘅立會選舉,縮短為兩年一次,咁香港經濟就一定欣欣向榮。阿虎認為親中派若想收復失地,土共一定要先收聲咪亂吠,以免招港人反感。

中怡貨散炒唔起
中怡精細化工(2341)以392倍超購成績上市,首日掛牌,股價竟然一度破底,低見1.37元,收報1.39元,僅僅高過招股價1仙咁大把。
Cookie話,此股有太多散戶認購,加上缺乏有實力嘅基金大戶坐盤,貨源唔易歸邊,所以相當惡炒。不過,中芯國際(981)就好唔同,唔少外資基金都要貨。中芯話晒都係國內最大芯片製造商,03年上半年計,產量全球排行第五,兼且生產成本比較平,唔少投資科技股嘅基金都有捧場,因此貨源容易歸邊。
至於濰柴動力(2338),生產大馬力的汽車用柴油機,食正國內汽車市場強勁增長呢條水,日後又可能陸續有收購行動,所以不乏實力派基金捧場。
阿虎