中怡精細化工（2341）差啲打破近排新股必升的定律，噚日高開之後，就幾乎直插到尾。
中怡噚日最高1.59元，尾市一度插穿招股價，低見1.37元，收市報1.39元，剛好高過1.38元的招股價。經紀陳話，隻股招股時太過受歡迎，所以貨源分到散晒，先至搞到咁款，但據講有人正在密密收集，唔使睇得太淡。
另外，經紀陳又同小初提及第一天然食品（1076），佢話隻股早排批過股，但古仔唔會就咁完，據講重有後着。
第一天然上個月底按先舊後新方式，每股0.64元配售8000萬股，集資5120萬元。由於配股之時，剛好遇着廉署調查廣興國際（1131）事件，導致股價復牌即插，一度跌到接近配股價。
不過，事過境遷之後，第一天然不但守得住配股價，更在跌市之中上揚，睇嚟真係唔簡單。
第一天然噚日最高0.72元，收0.70元，升2.9%，成交股數2677萬股，金額1879.6萬元。
慕容小初