近排外滙市場飛沙走石，美元兌日圓上月11日幾乎散到105邊邊，跟住3個幾星期，近日最高上番112樓上，呢6-7%變化，令到啲美元兌日圓窩輪更加飛沙走石。
呢啲窩輪有兩隻，9277同9155。前者係美元兌日圓Call輪，美元升，佢升。後者係美元兌日圓Put輪，美元升，佢跌，或者美元跌，佢升。
9277昨日收18.6仙，單日散15%，反映昨日美元兌日圓回落，同上月中低位比較，仍升130%，上月中至今，美元兌日圓係升咗。隻輪啱睇好美元（兌日圓）炒家買，6月底夠鐘，溢價3.1%，槓桿率41.9倍。條數大概係咁計，夠鐘嗰陣，美元（兌日圓）如果升唔夠3.1%，揸隻輪就會輸錢。如果認為美元仍然會散番，千祈咪搞呢隻。
9155昨日收8.8仙，單日急升24%，反映昨日日圓兌美元彈番上去。上月中到𠵱家，呢段時間日圓唔掂，隻輪由36仙散落嚟，76%輪價化作煙塵，啲殺傷力可想而知。隻輪啱睇好日圓炒家買，下月杪到期，溢價3.1%，槓桿率88.5倍。條數係咁計，夠鐘嗰陣，美元（兌日圓）如果跌唔夠3.1%，揸隻輪就會輸錢。假設，只係假設，美元如果再散到106日圓，隻輪升兩倍都似。如果認為美元仍然會強番，就千祈咪搞呢隻。
章盛