如果有一日一個港男食緊早餐，佢老婆忽然提議：「你去南極走一走，好嗎？」呢個港男，一定會認為老婆黐咗線。但係和黃前大班馬世民卻因太太珍妮花一句話，成功徒步往南極。
下個月就六十四歲嘅馬世民噚日同太太一齊喺午餐會亮相，呢位喺戰場、商場、沙漠同雪地從不言棄嘅老探險家顯得精神奕奕，紅光滿面，只係消瘦咗啲。
珍妮花回憶當日佢與同伴波迪爾駕駛直升機，喺南極中部失控墜雪地，最後獲救嘅幾小時，真係死過翻生，非常幸運，差啲連小孫女都見唔到，雖然家人勸佢唔好再冒險，但睇嚟冇乜用。
馬大班就話南極探險嘅五十八日中，最辛苦嘅係要時刻處於戒備狀態，反應要異常敏捷。南極好似無盡嘅雪山，全無生物，對於不速之客嚟講，最大嘅敵人係高達成百公里嘅風速，零下八十五度嘅低溫、險峻嘅山坡、白茫茫嘅環境以及隱藏嘅冰縫。
馬大班認為做人有時都要脫吓軌，唔可以只識返工，要聽吓老婆話，六十幾歲並不老，好似佢咁，重可以征服南極，挑戰自己。
（圖）馬世民徒步走去南極，原來只因太太珍妮花（右）一句說話。
傳真︰2623-9278
電郵︰