唔知點解，「萬人迷」碧咸今屆由曼聯轉咗會到皇家馬德里冇耐，就一直有傳佢會轉會，而車路士嘅英格蘭中場林柏特，重喺日前呼籲碧咸重返英超聯加入「藍戰士」；不過，碧咸就喺噚日回應話叫一眾想買佢嘅人死心，因為佢同皇馬嘅合約列明，如果想買斷佢喺皇馬嘅合約，就要畀一億四千萬鎊，即係成十八億二千萬港幣，絕對係天文數字！
碧咸就咁講：「如果要我喺今年離開皇馬，就要有人肯畀一億四千萬鎊，相信都幾難有人出得起呢個價錢。」咁又係，話就話車路士嘅油王班主阿巴莫域治啱啱成為咗全英國最有錢嘅人啫，但大拿拿要攞咁多錢嚟買一個球員，又真係唔化算！
酒能亂性，最近好多宗英超球員嘅風化事件，都係因為佢哋飲咗酒累事。阿仙奴領隊雲格有見及此，率先規定唔畀球員喺賽後飲酒，喺球員酒吧冇得飲，就連喺球隊巴士上都唔畀飲。雖然，雲格咁做好似好鐵腕，但佢咁做都係為隊波同埋啲球員好，我求大俠都好贊成㗎！
艾列頓轉卡塔爾籍事件愈鬧愈大，傳聞多蒙特戴迪同李安度亦快將轉籍，實行組「巴西三劍俠」，有資格踢今屆亞洲盃，主辦國中國當然唔想見到，影響爭標機會。我求大俠贊成應該將參賽資格條例修改，唔畀艾列頓踢，如果唔係亞洲盃以後就變聯合國部隊盃賽，冇意思。
國足熱身賽輸畀日之泉後第二日唔使操練，但班球員都冇得休息，莫非教練阿里漢（圖）要懲罰性練波？非也！只不過國足要幫「中國之隊」拍最新宣傳廣告，拍完重有半日休息。原來，友賽輸波後，阿里漢本來唔想畀班球員放假，但最後都改變初衷，等球員放鬆心情，算係唔話得！
拓荒者臭名遠播，連隊長史杜達米亞上年都試過喺機場俾人捉到藏有大麻；好彩佢迷途知返，犯事後就應承俄勒岡州報紙嘅一個專欄作家，話自己以後唔會掂啲衰嘢，歡迎隨時check佢。結果上周五呢個專欄作家真係突擊同佢做咗次藥檢；結果咪證明史杜達米亞真係洗心革面囉！