港股反彈，恒指一度升超過220點，收13573，升118點，期指低水則大幅收窄到45點，計埋滙控（005）同恒生（011）月中除息的因素，期指實際上已回復高水。
大市短期調整是否已完成（暫時低位係13403），要視反彈能否重上兩條短期平均線而定。現時10日同20日線分別在13652同13700，若升番上去，形勢會立即改觀。
不過大市即使調整完成，升勢再起，亦會係漫長升浪（長達11個月）的最後衝刺。2月底，恒指收13907，今個月未必可以連升12個月，即係會斷纜，但冇相干，若然在窄幅反覆整固，凝聚動力，則4月出現的最後衝刺，有力再創今浪新高，估計可向14600至15000推進，之後才會出現一次較大幅度的中期調整。
國企指數轉新組合，早輪被力壓的兩隻重磅股，中石油（857）同中石化（386）都轉勢，齊升3個位。中石化收3.35元，開始擺脫10日、20日同50日線（俱在3.26元水平），MACD亦出現入貨訊號，短期降軌阻力在3.45元，衝破機會極大，下一個目標將係今年初的高位3.9元。
聯洲國際（048）中期業績理想，股價亦有反應，噚日更升上2.05元，後回收1.98元，仍有2仙進帳。睇番長期走勢，由02年6月開始，聯洲形成一個長達1年8個月的大型圓底收集區，2元係重要阻力位，相信呢個水平會整固一段時間，若破位而上，中期升浪便確認，上升目標指向2.85元。
聯洲主要從事推廣和分銷時計、珠寶同皮具業務，旗下品牌近50個，在主要證券交易所上市的高檔次產品企業中名列第9位，亦係基金投資組合中的一員。主席史壁加持約40%，瑞士信貸集團持13.43%，德意志銀行則有5.23%。最近聯洲有兩手大成交上板，分別係800萬股同7674萬股，作價俱為1.89元，亦係由幾個基金接去。
04年度（5月年結）的中期，聯洲盈利7296萬元，大升99%，估計全年盈利可達1.55億元，每股盈利13.4仙，預測PE14.7倍，而同業平均PE係20倍，基金現價仍要貨，當然計過數。
郭兆誠