恒指最高嗰陣急升222點，埋單減半，升118點。全日高低波幅137點，幅度1%，但啲槓桿率勁大嘅窩輪，變化都幾得人驚。
恒生（011）收102元，冇升跌，最高104.50元。熱門恒生Call輪9162，因為槓桿率去到40倍，而溢價非常輕微，喺恒生正股波動唔夠3%嘅過程中，隻輪可以令人富貴變浮雲。隻輪最高32.5仙，比前市大升36%，埋單25.5仙，單日仍有6.7%進帳。不幸摸頂上車嘅，收市原來已經輸咗22%。
滙豐（005）是日定過恒生，最高123.50元，收123元，升1元。滙豐上周一派成績表後，周二裂口下跌，當日125元至122元，有個裂口遲早要填番。好消息出貨，出完貨之後，市場冇出路嘅錢，又會執番啲實力股投資，大市好番，唔會冇滙豐份，願意以較高風險換取較高回報，可以諗吓Call輪9274，𠵱家個價處上月初水平，5月到期，輪價62仙，溢價1%，槓桿率19.8倍，夠爆炸力。
電盈（008）復牌，張大出血成績表搞到好多人跌晒眼鏡，收5.55元，散7.5%。
10大跌幅窩輪，電盈Call輪佔6件。當中唔少價外得好厲害，最後好難翻生，咪手多。若然博正股技術性反彈，9791係正路對象，輪價1.05元，平水，槓桿率5.3倍，不過隻輪下周到期，冇得賭耐啲。
章盛