自德國寶馬汽車推出新一代5系後，歐洲中型豪華房車市場即時變得緊張起來，各家車廠紛謀對策應戰，其中份屬同鄉嘅平治率先推出新E-Class予以還擊，但奧迪汽車到最近才宣布推出新一代A6參戰，卻已成為歐洲中型豪華房車嘅「新人王」！
記者：鄭達基
歐洲中型豪華房車嘅市場競爭十分激烈，就連香港亦唔例外，無論誰有新車推出，皆會瞬間成為銷量榜冠軍。就好似奧迪A6咁，自年前城中名人李澤楷選用至頂級嘅4.2Quattro型號作座駕後，即時令不少名人明星爭相仿效，紛紛以奧迪A6或其他車系作座駕！
剛推出嘅新一代A6車系，車首用上扁長頭燈襯以大幅面鬼面罩作配搭，望落好有同廠旗艦級車系A8嗰種豪邁氣派，廠方又為新車勾劃出一個極像Coupe跑車般流線型嘅車身線條，務求令車格變得更年輕化。另外，用家又可為一對Xenon頭燈加入DynamicAdaptiveLight技術，頭燈會跟隨車速及轉向角度而調節照射範圍，從而增強晚間行車安全性。
新車軸距比原有型號長83mm（達2843mm），故此能為乘客營造出一個寬敞闊落嘅車廂空間；配合上前後兩排承托力甚豐嘅高級真皮座椅，乘坐妥貼舒適之餘又有高手觸感。另外，除有車門電窗及門邊電鏡等標準配備外，重有一套高級音響同埋令乘車環境更好嘅恒溫冷氣系統，當然唔少得重有以MMI（MultiMediaInterface）介面出現嘅控制系統，即使在駕駛時亦能輕易操控各項設備。
為迎合不同用家需要，廠方今次特別為新車安排有多個引擎配搭，當中包括全新2.4公升V6（馬力177匹，扭力23.5kgm）同埋3.2V6FSI（馬力255匹，扭力33.7kgm）型號外，重有頂級版本所採用嘅一台4.2公升V8偈，響一套6前速Tiptronic半自動波箱嘅輔助下，起步加速凌厲有勁。
至於四輪高效能碟式制動加ABS連EBD系統，增強制動表現，奧迪獨有嘅Quattro恒式四驅系統更會成為4.2V8型號嘅標準配搭，3.2FSI屬Option配備；由前輪四連桿及後輪扭力連桿組成嘅歐式底盤配搭，輔以ESP、ASR及EDL等電子系統，令座駕更咬地。
1﹒頭燈會跟隨車速及轉向角度而調節照射範圍。
2﹒車首用上扁長頭燈配以大幅面鬼面罩。
3﹒新車採用頂級版4.2公升V8偈。
4﹒前後兩排都鑲有高級真皮座椅。
5﹒由前輪四連桿及後輪扭力連桿組成嘅底盤，更咬地。
6﹒軸距增長至2843mm，令車廂比舊版更闊落。
