中國副商務部長安民，大罵李柱銘，講埋人哋先翁抗日將軍李彥和，又怒喝記者「走開走開」，真係令人對中國政府嘅形象刮目相看。
安民話李柱銘個先父係同共產黨作對嘅壞人，咁佢自己係唔係王穎妤所講嘅blueblood呢？
點知一翻查安民家世嘅舊帳，安民佢老頭子安子文，係中共前組織部長，即是掌管人事檔案嘅特工頭目，六十年代時期，佢曾經俾我哋偉大嘅毛澤東主席點名，話係叛徒，將安子文列為「六十一人叛徒集團」，重一度將佢踢入秦城監獄㖭。
毛主席話安民阿爸係叛徒，現在大家對四十年前嘅歷史已經有不同評價，即使香港人對安民近日嘅言論不滿，但無論如何，都唔可以唔尊重安民嘅老父。
安民嘅面口點解咁臭？北京知情人士話，因為佢俾新任商務部長薄熙來騎住，又就快到退休年齡，扶正無望，薄熙來資歷淺過佢，條氣唔順，咪謾罵李柱銘嚟發洩囉！胡錦濤呢頭講對政制討論「積極評價」，嗰頭安民就玩鞭屍，大家都話胡溫真係好識權術手腕。
傳真︰2623-9278
電郵︰