電視台有位外表純情嘅新紮姐仔，表面上清新可人，所以觀眾緣都唔錯，同時因為佢扮嘢幾成功，又識擦高層鞋，呢輪星運都幾好。不過有時睇嘢就唔可以只睇表面，喺得娛樂圈打滾，又點會真係咁簡單呢？唔少同純情姐仔合作過嘅低層戲劇組工作人員，對佢印象就麻麻，話佢個人都幾白鴿眼，成日對低層員工擺阿姐款。
好多人以為個姐仔真係好純情，其實佢好耐以前已經同一個已婚嘅專業人士行埋，雖然佢明知對方唔會同老婆離婚，但佢依然同佢一齊，最大原因當然係經濟問題啦！冇法啦，做電視台姐仔人工真係好有限，唔搵個男人照住幾難日日身光頸靚！純情姐仔重好有恒心，一心想話等待時機可以坐正㗎！不過呢個姐仔另外重有個男朋友，呢個男友就幾公開嘅！咁樣一腳踏兩船，睇嚟都好難可以升做正宮啦！
柯受良個仔柯有倫噚日同助手由台灣嚟香港，參加亡父嘅最後作品《生死速遞》首映禮，佢話今次專登飛過嚟留一日就走。
問到佢父親嘅骨灰安放喺邊，佢話：「其實所有嘢都搞好晒，不過骨灰安放嘅地址我唔清楚，要問番媽咪。」
林曉峰噚日喺商台主持《茶煲裏的查篤撑》時，竟然口快快爆粗都唔知。節目開始時查小欣講到自己嘅是非，佢話：「關於我嘅是非我唔打算喺度講咁多，呢啲無謂嘅周刊，無謂益人。」喺呢個時候身為拍檔嘅林曉峰就第一時間話：「唔好講咁×多。」雖然後尾即時講番一句：「唔好講咁多。」但係句粗口清楚聽見，想兜都兜唔番！
蔡依林前晚喺台南舉行完簽名會後返去台北，佢一落機即刻拎住部手提電話係咁睇啲短訊，令人懷疑佢同緋聞男友周杰倫以短訊傳情。而繼周杰倫做百事代言人後，蔡依林亦都會喺稍後做百事代言人，跟周杰倫可算係「夫唱婦隨」。
倫永亮舊年使咗八十萬喺舊居舉行咗一個小型演唱會，最近就推出咗一隻名為《一夜笙歌》嘅碟同歌迷分享。噚日佢接受商台節目訪問時，被問到演唱會嘅構思，佢話：「我一直希望喺屋企或者啲細嘅地方開演唱會，感覺好溫馨。」另外倫永亮透露𠵱家寫緊一個以中國歷史為題嘅音樂劇，但暫時重未有落實嘅投資者。
傅珮嘉近日被指同男子組合Boy'Z嘅Steven傳緋聞，並指係女追男，傅珮嘉噚日喺新城做訪問，佢話：「我唔會主動追男仔，近日亦冇心儀對象。」有報道指傅珮嘉重未得到無綫解封，佢話：「我唔知呢件事，我嚟緊都同無綫拍MV，唔覺得被封殺。」若果真係冇封殺就最好啦，話晒傅珮嘉重要努力搏殺㗎！
黃磊同女友孫莉拍咗九年拖，最近一直有消息話佢哋會結婚，噚日黃磊主動打電話畀台灣主持張小燕，承認同女友已經辦完註冊手續。黃磊本來冇諗過要大宴親朋，因為要請嘅話真係唔知請得邊個。不過，佢決定五月會喺北京補擺喜酒，到時會請台灣朋友去喎。咁唔知到時又要擺幾多圍呢？
