發展商近期推盤，短時間就可以賣出大部份。好似新地窩打老道8號，十零日已經賣出三百五十伙，佔六成幾，成績好理想。
原來樓盤嘅二手都好活躍，聽中原王志忠講，已經有一百八十個單位放售，等於賣出單位嘅五成一，都咪話唔厲害。
窩8二手放盤，叫價通常比購入價高一成半至四成，而成功轉手有八宗，賺八到十五個巴仙。
王志忠話，唔好以為賣方個個都係炒家，有啲原本計劃自住，但見有人出高價洽購，所以就沽貨賺錢。
好似其中一個買家，以一百九十六萬買咗個五七三呎單位，後嚟以二百一十八萬沽出，一個禮拜賺咗二十二萬。
啲一手盤都未賣完，就已經有大把二手放盤，咁樓市算唔算熾熱、炒風太勁呢？
有啲業內人士開始擔心，個市可能要出現調整㖭。
香港居住密度高，好多屋苑難見天日，但係𠵱家想擁有藍天白雲都有辦法，因為有得賣。
諗到話出售天空嘅，係萬泰長沙灣郝德傑山，售樓書封面話明，skyforsale。
樓書裏面有唔少相，全部係藍天白雲、碧海青天同山天相接……蘭西睇完都有啲心動。
當然，發展商最終目的，梗係話畀大家聽，買咗郝德傑山，就可以擁有以上一切美景。
今日樓盤會開放示範單位畀傳媒參觀。
市道暢旺，地產代理擴充大計紛紛出台。中原地產豪宅品牌StatelyHome，由港島擴展到九龍區。
呢個豪宅品牌第一間九龍分行噚日開張，選址就係近年新興嘅尖沙嘴豪宅區。
中原一姐劉瑛琳話，今年會積極拓展版圖，淨係上半年就準備開十間分行，動用資金三百萬。
除咗噚日間千五呎柯士甸道舖，會喺美孚、東九龍、將軍澳、紅磡等區落點。兵力就會增多一百人。
講起請人，唔知係咪市道好咗，一姐話，近排見到唔少以前嘅資深代理，重投代理。相信呢啲咁有經驗嘅代理再入行，樓市買賣會更暢旺。
至於新入職嘅員工，底薪不變，但就會用獎金嚟做獎勵。例如會按促成交易金額，設定獎金或者送旅遊做獎賞，比起淨係加底薪更有推動力。
投資物業市場交投熾熱，第一太平戴維斯投資部，兩個月促成十三億成交，其中零售舖位部三億五，全幢商廈四億二，分層寫字樓五億三。
嚟緊個個話睇好樓市，投資物業市場又潛在拓展空間。
戴維斯投資部資深董事袁志光透露，公司計劃再多請至少五個人，進一步開拓包括商舖、以至寫字樓市場。屆時投資部人手會增至二十名。
銀行借錢畀客買樓，為咗唔想佢哋短時間內轉賣，所以規定喺指定時間內贖樓，要收取罰息。不過，因樓價升得太急嘞，好多單位就算畀埋罰息，轉手都有可觀利潤，咁罰息又點可以阻止啲客提早贖樓呢？
雖然係咁，但樓按始終係最穩陣嘅業務，加上銀行水浸，所以有銀行就向啲贖樓客提出，若贖樓後再買入嘅單位，都搵番佢哋做按揭，就唔使罰息。
客人計落有着數，銀行又唔使擔心冇咗條財路。假如個客買入多過一件貨，銀行生意重多咗㖭，一家便宜兩家着。據聞，用呢條橋嘅係一家規模唔細嘅銀行。
香港人富有，連買樓都咁豪，一次過畀錢面不改容。
世紀21新都城分行經理曹國鳳話，有客買入將軍澳南豐廣場六座六三三呎高層，一筆過畀晒一百六十四萬四。按揭？冇諗過。
買家係商人，揸住三百萬，想買兩件貨收租，睇咗幾件，但係有啲業主唔肯即時收定，只有呢個制，價錢又平五個巴仙，咪嗱嗱臨扑鎚。
曹國鳳話，一次過付款，喺區內唔係先例，之前有兩三單，原因係樓價跌咗咁多年，啲買家又儲到錢，所以咪可以一次過攞百零萬買樓囉！
蘭西
電郵地址：
