滙控（005）回穩，藍籌股全面上升，恒指收報13573，升118點。噚日市場焦點在電盈（008）及東方燃氣（432）身上，滙控無視被美林剔出歐洲投資組合的不利消息，全日升0.82%，收報123元。
電盈將地產業務注入東燃，同和黃（013）將固網注入中聯系統（757）手法十分相似，而且連股價走勢亦相似，東燃抽到天咁高之後大幅回落，唔少跟風嘅散戶都損手。東燃噚日一度升近3倍，高見1.90元，以平均成交價1.368元及收市價1.03元計算，噚日追貨的投資者，平均要輸25%。
中聯及東燃有唔少捧場客都蟹咗，阿虎對超人旗下即將上市嘅TOMOnline（8282）再唔敢有任何期望。
電盈沽出地產項目，令業務變為一隻純固網股，本港固網業務前景唔睇好，而沽出嘅地產業務又未能即時套現，要等東燃賣樓套現後，才有錢還畀電盈，所以成單交易對電盈唔算好着數。市場人士開始揣測，小小超可能會淡出電盈，日後可能將全副精神放在東燃身上，甚至有傳聞話，東燃日後可能成為小小超嘅物業旗艦，而非電盈嘅物業旗艦。電盈噚日大跌7.5%，並非單單因為舊年勁蝕逾60億元咁簡單。
財訊傳媒（205）噚日約咗一眾財經界人士吹風，話將落實國內收購雜誌廣告代理權一事，重揚言手持1億元，足以在國內大展拳腳。該股最近有異動，可惜成交不足，噚日股價升3.4%，但成交只得480萬元。
阿虎