餐廳羅經營餐廳，發覺去年開始有自由行之後，生意的確係好咗，生意叫做有番利潤，但好咗冇幾耐，旺區啲舖價，舖租升得好急，升幅遠遠超過佢嘅餐廳營業額，而且啲炒家一味唱好，餐廳羅好怕俾新業主逼遷，問計於幾位老友。
X醫生喺銅鑼灣開診所，已有十幾年，客路穩定，佢話：「我經常向病人問候吓：生意好唔好呀？有冇人工加呀？據我啲病人——主要係中產階級，附近店舖經理——反映，有增長，不過唔係咁多，佢哋傾向於儲蓄，不敢增加消費，因為見過鬼怕黑喎；店舖經理就話旺丁不旺財，好睇唔好食。所以你唔使咁驚住，或者新業主知道實情，體貼吓你呢！」財務伍就話：「我哋公司最近想搬，租務代理quote價幾啱聽啫，中環一帶，華人行呎租十八蚊，會德豐十九蚊，律敦治大廈十六至十七蚊，新世界大廈十六至十八蚊，兩年租約全部免租兩個月，租金可再講價，記得九八年初，律敦治大廈重係租緊四十蚊一呎，同現價相差成六十巴仙，次級啲嘅大廈，只係叫價十二至十三蚊，所以我睇唔出高價追貨有乜好處噃。」
話雖如此，餐廳羅更覺憂愁，因為佢在鰂魚涌一帶亦有餐廳，如果中環大廈啲租金係二十蚊一呎以下，邊個間公司肯留響太古坊一帶？唔怪得該處嘅生意越嚟越差啦，啲寫字樓搬得就搬喇喂。