上個禮拜港股烏雲密布，噚日終於有番百幾點反彈，但係八方再次提醒股民：秋官又嚟喇！今次套戲，淨聽個名，好似好「愛國」，點知「愛國」十分血腥，叫做《血薦軒轅》，秋官做明朝錦衣衞首領，一出場佢就帶領成班人係咁殺啲刺客，真係死得人多。記得九七年秋官有一套古裝戲叫《江湖奇俠傳》出街，適逢港股股災，金魚缸都死得人多。
記得舊年十月初秋官套《非常外父》啟播嗰日，港股升咗百二點，大家重以為秋官效應唔再靈驗，點知嗰日收市後恒基地產就抽水，之後港股連跌兩日，播到第十四集（十月二十三日）嗰日，港股大跌五百點，係美國九一一恐怖襲擊以來第二大跌幅。
對於秋官效應，股民亦可以從好方面諗一諗，當係跌市訊號，提醒大家咪咁狂。今次套劇第十四集已經係台灣大選過後，冇事喇啩？
講開股票，小小超隻八號仔忽然要搞分拆，加上業績因撇帳而蝕六十一億，噚日復牌，未睇秋官套新劇，股價已應聲下跌。
小小超雖然冇露面，但係佢原來都好掌握情況，連有個電盈外判工程工人因工由高處墜地，重傷昏迷佢都知，重即時私人畀咗十萬蚊呢位工人嘅家屬，以濟燃眉之急。聽講，嗰位受傷嘅工人噚日朝早嘅情況好轉，可與家人談話。
傳真︰2623-9278
電郵︰