上個禮拜，全香港差不多所有波鞋雜誌都有報道某店嘅兩對佐敦牌產品：分別係白灰色AJ19，同全球首次曝光的金塊色AJ2。有人話呢兩對鞋係美國限定，更有人傳係網上限定或佐敦牌會員限定；雜誌講到點勁點勁，我又試吓從另一個角度分析吓呢啲所謂「快貨」！
首先講吓乜嘢係快貨，通常都係話從工廠直接攞出嚟，其實不外乎以下三種情況：
一係鞋辦，有啲根本係睇款辦，只有外表而內涵欠奉。另一啲就係工廠生產時預咗多出嚟以備損耗，或者質量唔及格嘅次貨；無論如何，佢哋都係未經版權持有人許可而流出市面的產品，俗稱「老鼠貨」。嚴格嚟講，店舖售賣此等貨品，都同接贓或售賣賊贓定義相同，版權人絕對可以採取法律行動！
商店咁做已經唔好，傳媒報道就更唔啱，大家好似執到寶咁爭相報道，取向更加係促銷多過報道。對鞋來歷有問題重照吹一輪，講到返到貨好似「港人驕傲」咁，試問點可以為促銷賊贓而感到自豪呢？
H觀點係買鞋都係買行貨好，質素有保證又有保養；無謂心急貪快買啲來歷不明嘅鞋，驚人渾水摸魚之餘，重分分鐘助長他人犯法行為，咁講完你都重要買我就真係冇嘢講！
廣告時間，嚟緊三月十三同十四號，尖沙嘴某商場會有大型波鞋展，有好多正鞋睇兼免費入場，小弟嘅網站都有一個小小展台，詳情留意小弟的網站！
Hleung──波鞋網站
Email: