今日帶大家睇馬鞍山郊野公園「女婆石景」，女婆山高399米，山高奇石多而巨，「豪豬石」、「大炮石」、「馬鞍石」等粒粒都係重量級巨石，不過講到最神似，首推一柱擎天「陽元石」，有幾似？同行模特兒Kiko睇到面紅耳赤要擰歪面，你話似唔似？
記者：陳震霖
攝影：Kenny
模特兒：Kiko、Zoey（Space2)
起點西貢菠蘿輋，沿菠蘿輋路直上，中段見到1間荒廢公學，門口4個石字寫住「新聯學校」，「新聯」？個名咁似聯誼會嘅？Kiko好奇心重，步入校門，發現學校豈止荒廢，簡直完全消失，環視四周只剩番大片雜草地，無個門牌都唔知呢間係學校。
再行15分鐘，見十字路口，點行？記住靠強記士多嗰邊小路進發，路盡接馬鞍山郊遊徑登昂平，山路雖然斜，但不急，遇着好天氣，視野清晰，山下西貢海一覽無遺。慢行45分鐘，上登平原，2人已身處昂平，完成旅程三分一。
續接麥理浩徑第4段，西行30分鐘到達茅坪，茅坪有塊可以容納百幾人嘅大草坪，面積雖然比唔上西貢另一邊嘅嶂上平原，不過有大片金黃色蘆葦田補償，靚景影相一流。
影完相，即睹茅坪廢村現貌，廢村人迹荒蕪，附近林木茂盛，古道又俾溪澗包圍，勁似行入亞熱帶森林，沿途數十間廢屋，最過癮係間鄉公所，勁似電影拍攝場景。村內四周有高達10呎石牆，估計係為防止澗水氾濫保壞田畝而建，𠵱家成條村已經搬去菠蘿輋，並改名為茅坪新村。
緩緩向西落叢林古道，古道大樹好遮蔭，易行好走，道盡抵達梅子林，梅子林有條𠵱家重有村民居住嘅梅子林村，最值得一睇嘅係棵高過人嘅野生仙人掌。離梅子林10分鐘路程，出現一路標，路標指示2個相反方向，一面指花心坑，一面指番梅子林，女婆山呢？記住嘞，雖然路標無明確指示上女婆山方向，但跟住路標後面條明顯山路上就一定無衰。
女婆山名稱由來好有趣，據附近村民講，女婆山原名「雷婆山」，高399米，可能山高招風雨喇，山頂經常行雷閃電，所以村民起名叫「雷婆山」，但後來又覺得雷雷聲，好難聽，嫌殺氣太大，讀歪啲，「雷」變「女」，叫叫吓就變咗𠵱家嘅女婆山，地圖上嘅顯示位置都係寫女婆山。
女婆山南面小山崗叫女婆坳，山路初段無難度，Zoey與Kiko愈行愈快，路至中段，山勢變得陡峭，加上由草地變成沙地，愈行愈跣，要步步為營，無驚無險15分鐘，4個巨大石陣就在眼前，香港奇石唔少，但「奇」兼且「巨」，就確實罕見。
有幾巨？先睇「陽元石」，石高15呎，正面睇最似陽具，粗幼長短極啱比例，一柱擎天呈亢奮狀態，比鶴咀石室同南丫島陰山嘅「不文石」更神似，Zoey一見大呼過癮，Kiko人斯文，臉紅擰歪面；「陽元石」後面嘅「豪豬石」重誇張，高近30呎，闊近40呎，爬上石頂有一定難度，可免則免，豪豬者，箭豬是也，都唔知點解本地旅遊界會稱佢為「豪豬石」，橫睇掂睇無忽似箭豬，Kiko反而想像力豐富：「我話似巨大饅頭，叫『饅頭石』至啱。」
「女婆石景」又點止2顆奇石？重有橫卧「大炮石」、騎得上去嘅「馬鞍石」，其他奇石重等緊你發掘命名。睇完奇石落山，經花心坑下落廣源邨，正式完結今日旅程。
上山下山，唔經唔覺行咗5小時先到達花心坑村，消耗咁多體力，點都要整番碟炒粉麵飯祭吓五臟廟，Kiko同Zoey雖然貪靚，但都顧唔到咁多，減肥計劃即刻放埋一邊，兩姊妹話咁快就清晒枱面碟乾炒牛河同叉燒炒飯。
家家小廚（26377871）
地址：沙田花心坑村36號
交通
去程：鑽石山地鐵站乘92巴士（$5.5），西貢公路菠蘿輋站下車。
回程：廣源邨黃泥頭巴士總站乘83X巴士（$5.8），九龍灣地鐵站下車。