喺我羅拉心目中永遠係鑽石王老五嘅福山雅治，最近拍嘅一個潔齒香口膠廣告，條橋都幾新幾搞笑。
呢個廣告係食住福山上次扮黑炭礦工條橋，今次講福山係一個作家，佢夜晚返到屋企都唔使着燈，皆因佢擺咗支人肉燈喺屋企，無論睇書、瞓覺、煮嘢食咁，排牙白到發晒光嘅人肉燈，都會好似鬼咁突然出現喺身邊照住佢。
雖然間屋好似多咗隻活死屍咁，但福山一於少理，好cool好悠然自得咁做自己嘢。
福山拍緊呢個廣告嘅時候，都話如果現實中佢有支咁嘅燈又唔錯，佢話：「咁佢係人，有啲人味嘅燈，點都好過冷冰冰嘅死物，最緊要係慳電費！」
另外，福山雖然做咗呢個有啲辣味嘅香口膠代言人好耐，但佢拍廣告時竟然話其實自己鍾意食甜嘅糖多啲，人哋成日話福山好有腦，點解咁倒自己米㗎？