中國良心醫生蔣彥永先生，趁北京兩會，上書胡溫，要求平反六四！
蔣醫生就係去年向美國《時代周刊》揭發中國沙士瘟疫真相嘅勇士。同李柱銘勇於向美國國會講出特區真相一樣，蔣彥永醫生不怕被中國政府標籤為「勾結外國勢力」嘅「漢奸」，都要向美國講述中國沙士真相，全因為蔣醫生嘅良心直言，先至迫使胡溫炒咗衞生部長張文康，時間證明，蔣彥永醫生「勾結美國勢力」、「干預中國內政」，挽救咗中國，亦挽救咗全世界！
蔣彥永醫生今次再接再厲，要求胡溫平反六四。比起香港嗰一班土共，包括在六四時曾經投機買鄧小平李鵬政府垮台，假惺惺聲討「中共法西斯政權」嘅梁振英、曾鈺成、鄔維庸、譚惠珠，今日一聽見「六四」就左閃右避、木口木面嘅香港老左偽「精英」，蔣彥永醫生嘅情操，光照全球。
大家一樣係學醫，一個蔣彥永，珍視人命，尊崇人權，對得住自己嘅良心，另一個叫做鄔維庸，就舔附權貴，當香港人係野狗，喪盡天良。一樣米養百樣人，邊啲係英雄，邊啲係真正嘅小丑，請全港市民，除低類似安民嘅嗰副有色眼鏡（如果有嘅話），擦亮眼睛，再一次睇清楚！
蔣彥永醫生如果唔向美國「告狀」，世衞組織點會咁快干預中國沙士疫情嘅「內政」？港人治港，高度自治，係由中英聯合聲明合法規定，聯合國註冊，李柱銘如果唔提醒國際，香港發生緊乜嘢事，又點可以擔保中國會徹底遵守國際協議？若然土共其心光明正大，使乜一見到李柱銘去美國，就發出咁惡毒詛咒？
蔣彥永醫生寂寞嗎？不！因為香港民主黨議員司徒華，十五年來一樣堅持要平反六四。蔣彥永醫生嘅人道精神、人權信念、人格情操，喺香港，喺海外，在全世界，都受到尊敬。
蔣彥永係「漢奸」，係「賣國賊」，係「吳三桂」？呢啲，就係商務部副部長安民，同埋曾憲梓、鄔維庸、梁振英同土共左仔顛倒是非嘅虛假邏輯。真理無國界，由蔣彥永醫生身上，我哋感到鼓舞，中國一日有蔣彥永，一日有希望，蔣彥永醫生嘅精神，由香港人來延續，九月立法會選舉，大家選邊個政黨，選邊個候選人？香港人要有良知，有正義感，唔好再任人侮辱！
傳真︰2623-9278
電郵︰