中信資源（1205）上個月初因為獲阿媽注入澳洲鋁廠生意，令股價一度急升至1.70元，正當大家憧憬公司挾住中信嘅大名，陸續有搞作之際，中信資源隨即配股，配完股之後，股價更即刻破底，小初有幾個朋友都因此損手。
中信資源喺上月初，以先舊後新方式，每股1.45元，配售2.7億股，集資3.8億元。復牌後旋即跌破批股價，一度低見1.30元。
經紀黃話，隻股應該重有下文，據講在股價低迷之時，有關人等一直在密密收貨，噚日正好係有關交易寄出股東通函嘅日子，反映距離交易正式完成之日不遠，所以隻股即刻有反應，成交增加唔少，金額有成1431萬元。中信資源噚日最高見過1.43元，收1.38元，微升1.47%。小初即管留意一下，睇吓對唔對辦。
另外，剛剛完成賣殼，等緊改名嘅實力中國（472），股價近日都好有實力咁上升，噚日大升11%，收0.405元。經紀陳話，買完殼之後，公司例牌都會搞一次配股，相信實力中國都唔例外。
慕容小初