由電視到大銀幕電影嘅偵探片「神探俏嬌娃」，講述三名靚女私家偵探嘅查案故事。
新世界（中國）地產都請咗三位俏嬌娃，不過就唔係去查案，任務係介紹點樣「揀樓」，個盤係深圳鹽田沙頭角口岸豪宅倚山花園。
呢三名「揀樓俏嬌娃」，其實係新中廣告片主角，分別係藝人水明琪、利嘉兒同內地人氣模特兒王妃。
水明琪飾俏嬌娃三號，係潮流指標；二號利嘉兒係品味化身。至於能夠喺選角時擊敗一眾對手嘅王妃，唔使講都係美貌同智慧兼備嘅揀樓天后俏嬌娃一號啦！
佢哋會介紹倚山花園嘅特色，周邊城市配套設施，同埋樓盤投資潛力。
套「揀樓俏嬌娃」廣告片今日就拍完，有興趣就要留意嘞。
倚山花園，共分三期，第一期二十三幢別墅已經落成，第二期小高層就快推出市場。
電盈嘅薄扶林貝沙灣一二期，唔少買家轉手都賺到笑，所以第三期幾時開賣，梗係好矚目啦！市傳日前電盈搵過啲代理傾偈，睇嚟都係開賣期近嘞。電盈基建主席李智康都話就嚟賣。
另外，佢又透露，電盈將地產業務注入東方燃氣後，電盈主席李澤楷會出任新公司主席，佢就做CEO，不過，李智康笑住話呢個職位有兩個解釋，一個係ChiefEatingOfficer，另一個就係ChiefEntertainmentOfficer，即係飲飲食食咁解。
雖然李智康識飲識食係人都知，但佢賣貝沙灣成績咁好，小小超又點會淨係要佢去飲飲食食呢？
一手同二手成交持續增加，代理做到分身不暇，不過，因為市況變化迅速，公司後勤要不斷開班，等前線員工可與時並進。
香港置業董事胡日發話，除咗年初開辦二手實務課程外，最近請律師講「摸貨」交易要注意嘅事項。
蘭西覺得，呢類課程其實代理行前線同後勤都要知，好似「摸貨」咁，因為好多年都未試過咁旺，一啲新入行嘅同事，可能都唔清楚點界定。
胡日發又透露，公司喺大角嘴柏景灣分行設咗個「樓花轉讓顧問專組」，提供一站式顧問服務，重順便做埋前線同事嘅資源調配中轉站。
蘭西
電郵地址：
