新車速報：<br>日產8人車雙人床車廂搭新包圍

新車速報：
日產8人車雙人床車廂搭新包圍

近年，唔少本地歌影視紅星及商賈富豪，都喜歡以豪華MPV作座駕，其中最受歡迎嘅車款，相信除咗豐田Alphard之外，份屬同級嘅日產Elgrand亦會佔上一席位。為吸引用家，最近就有某大獨立車行，引入裝上全車原廠包圍嘅ElgrandRiderS特別版抵港，最勁都係個車廂，大到十足一張雙人床！

記者：鄭達基　攝影：陳偉強

前排
■三排座椅以半皮半絲絨鑲嵌，前排表板右旁有門邊電鏡及電趟門開關鍵。

中排
■中排除有雙趟門組合方便上落外，左右兩張座椅更可獨立作180o轉動。

後排
■後排座椅能獨立收摺起，以增加尾廂載物容量 ，實行客車變貨車。

變身雙人床
■將三排座椅覆摺放平，可成為一張敞大嘅卧鋪瞓兩三個人都無問題。

■兩邊門鏡裝有電鍍保護殼外，重有指揮燈配置。

■附自動感光開關功能嘅超白光頭燈，配以霧燈組合。



講到豪華MPV市場中最受香港車迷追捧嘅，實非來自日本嘅豐田Alphard及日產Elgrand莫屬，前者無論行貨或水貨都有好銷量，而各家車行更絞盡腦汁為其推出特別版，以吸引車迷注意；後者則以不變應萬變嘅策略應戰，而且亦不乏捧場客，當中可從代理於早前推出嘅「銀影版」備受追捧而得知。

■雙出式方型跑車尾喉，能讓引擎呼吸暢順。

■兩邊呈長方形的尾燈都有電鍍邊修飾。

座椅可180o轉動
稱得上係豪華MPV，車廂鋪排當然要有番咁上下高級！所以廠方特別為新車裝鑲有半皮半絲絨，兼有十足承托力嘅座椅，其中座椅編排更好使好用。
當遇有需要時可將尾排左右座椅獨立收摺起，以增加尾廂載物容量，又或者將三排座椅覆摺放平，演變成一張敞大嘅卧鋪，另外中排左右兩張座椅，更可以獨立作180o轉動，將座駕演變成流動辦公室都無問題。至於前後獨立恒溫冷氣系統、包括顯示屏幕在內嘅高級影音系統、雙天窗，同埋全車窗簾等設備操控，都能觸手可及。

■從車尾定翼的倒車攝錄鏡頭（中圖）傳送至中控台屏幕檢視車後情況。



車廂其他設施

■真皮襯金屬嘅波棍，好揸手！

■中控台頂端設有多功能顯示屏幕，下方更設有杯座組合。



原廠跑車大包圍
這部日產ElgrandRiderS特別版，亦加入了原廠跑車大包圍、電鍍尾燈冚、雙出式方形跑車尾喉，同埋四輪RiderS特別版專用17吋跑車電鍍胎軨，響車尾定翼嘅襯托下，望落真係好有跑車Feel㗎！
與此同時，一對附自動感光開關功能嘅超白光頭燈，匹配霧燈組合，可有十足照明度，令晚間行車變得更安全之餘，車尾定翼更有攝錄鏡頭，駕駛者可透過設於車內嘅屏幕得悉車後情況，倒後泊車倍見得心應手；而左右雙電索趟門配搭，能方便乘客上落外，其中左邊一道車門更可遙控操作㖭！

■表板資料豐富易讀，轉數表下方重有波檔顯示。

■門壁兩旁設有杯座及雜物匣外，輕按門壁上嘅開關鍵重有藍光透出。

3.5V6偈夠力
雖然外觀及設備配搭有多項改動，但呢部8人車依舊以一台享負盛名、編號為VQ35DE嘅3.5公升V6DOHC引擎作核心，動力輸出充裕唔再講，加上線性輸出，響一套可轉化成手動操控嘅5前速半自動波箱配合下，起步加速絕無予人遲緩嘅感覺。
另一方面，由前輪柱式獨立及後輪多連桿所組成嘅懸掛系統，行車時有出眾嘅支持力外，亦能為乘客帶來一個舒適嘅乘車環境；當然四輪碟式制動加上ABS連EBD裝置亦唔少得！

■3.5公升V6DOHC引擎，輸出夠晒火候！

日產ElgrandRiderSProfile
引擎：3498ccV6DOHC
馬力：240ps/6000rpm
扭力：36.0kgm/3200rpm
傳動：5前速半自動波，後輪驅動
懸掛：（前）柱式獨立（後）多連桿
制動：（前）透氣碟（後）透氣碟（ABS）
輪胎：215/60R17ToyoTranpathJ46
尺碼：4850×1795×1900mm
軸距：2950mm；車重：2010kg
平均耗油：8.2km/L
新車售價：$450,000（電視屏幕另加$38,000）
車輛提供：AT1000.com（25252109）

■新車屬5前速半自動波，後輪驅動。

記者試後評語：坐得好舒服
呢部新近抵港嘅日產ElgrandRiderS，單係外觀已經好有跑味，加上以半皮半絲絨鑲嵌嘅座椅，同埋齊全車廂配備，乘坐倍見愜意舒適，當然一台3.5公升V6偈嘅澎湃動力輸出，亦功不可沒。