作為電影工作者，很想第一時間看到奧斯卡頒獎典禮。早上九時準時開始看電視直播，雖然未來得及有中文字幕，但齋看畫面加連猜帶估，也看得津津有味，大部份技術獎項已名花有主，餘下便是最佳男、女主角、導演與電影獎，還有終生成就獎，踏正十二時，直播又突然終止（去年已試過一次），原來是要播教育電視。
登時嬲得掉遙控，口中唸唸有詞地找收音機，按到一個頻道正在現場直「講」奧斯卡，當BlakeEdwards得到終生成就獎時，主持人一時之間不知BlakeEdwards的來龍去脈，求其搵嘢講，但語調仍夾硬保持權威，於是第一時間關掉收音機，上網睇Oscar.com冇咁嬲。
事後看報紙才知道，原來無綫節目部已有解釋，「明珠台爭取到播映權都唔想失真，但政府以唔係公眾利益為由冇調節過。觀眾都鍾意睇呢類型節目，希望政府會正視。」真係有冇搞錯?!奧斯卡咁大件世界盛事都唔算係公眾利益?!唔能夠同世界上其他嗰十億人同步知道賽果，你知唔知個感覺有幾Out？假設一名愛電影的外國遊客在酒店中睇奧斯卡直播，睇睇吓突然播教育電視，我諗嗰位遊客返鄉下時真係有排唱衰香港。教育電視真係咁緊要？教育電視真係咁好睇？睇少兩個鐘頭真係會導致整個教育制度崩潰？又點解唔畀啲學生與教師一齊睇奧斯卡，讓大家與世界同步，順手學吓英文都好吖。