蘋果日報慈善基金二○○四年度第一季社會服務計劃撥款申請已經喺上月二十七日截止，愛心基金委員會合共收到五十五份計劃書，大使呢幾日都埋頭苦幹整理緊有關嘅申請，希望趕及喺三月下旬開會同盡快公布結果。
經大使初步分類，今次申請嘅服務計劃大致有幾個範疇，包括關顧老弱、輔助就業、教授技能及知識、情緒輔導、家居維修等等，受惠對象有長者、失業工人、青少年、新來港人士、單親婦女及長期病患者，層面可謂相當之廣泛。
計劃書雖然多，但多啲嚟，密啲手，我哋咁辛苦，無非都係希望幫到更多真正有需要幫助嘅人。講開又講，蘋果愛心基金委員會因應社會需要，單係喺二○○三年度，就一共批出咗七十一宗社會服務計劃，撥款金額超過五百萬元，可算係近幾年之冠，大使唔敢講今年會唔會再破紀錄，但蘋果基金一定會盡力而為，善用廣大讀者交託畀我哋嘅每分每毫。
暖流熱線
電話:29908688
傳真:23702192
電郵:
網址：