娛樂版話歌星仔BB愈來愈招積，囂張程度涉嫌與身份不相符。醒起潮界經紀「鬍鬚弟」曾與BB屬「珠海」同學，立即打電話八卦一番，「鬍鬚弟」全程答案非常玄妙：「BB又點會寸呢？佢都不知幾咁Nice，我哋以前成班同學不時去踩單車同搞大食會，成班人好鬼Friend。雖然𠵱家間唔中做嘢會相遇番，佢都當唔識我哋，招呼都唔打個，不過佢貴為明星，寸就好應該，所以我從來冇介意過！未紅先驕喺呢行好常見啫！」。呢番說話實在要花啲時間思考。「鬍鬚弟」繼續：「BB星途如何我就唔評論咯，不過我肯定佢御夫有術，所以一直穩坐大婆位置。佢好識做，知道男友係正牌潮界Fans，所以每次有潮嘢推出，佢都第一時間幫男朋友仔買番件以討歡心。尤其嗰啲Kubrick同Be@rbrick仔，每次有新Series出，BB都自動自覺親身落旺角兆萬幫佢入貨，重買埋個專用Display，有時重順手落埋信和幫佢買特別版Nike。你知旺角幾咁雜，好彩佢喺旺角冇乜人認得佢，唔似栢芝被大班Fans包圍，搞到買嘢要落閘咁誇張，所以你話BB係咪比較平易近人喇？」
主持人：大食Jack
八卦熱報：