自從鞏俐同內地演員孫紅雷合作演出電影《周漁的火車》後，就成為好朋友。繼上次俾人影到佢哋行北京秀水街後，近日內地有傳媒報道，又話有人見到孫紅雷帶鞏俐返哈爾濱老家過年。
報道話其實鞏俐唔係第一次同孫紅雷去哈爾濱，前年十一月佢哋被目睹喺哈爾濱某桌球會篤波。而今次就發生喺上個月，孫紅雷帶鞏俐返哈爾濱屋企過元宵，重見埋孫紅雷嘅父母。
其間孫紅雷同哥哥重一盡地主之誼，帶鞏俐去買衫，店員都話見過佢哋一齊出現。當日孫紅雷戴住太陽眼鏡，鞏俐就戴住頂帽同大口罩，反而孫紅雷嘅哥哥就冇咁遮遮掩掩。
今次行街主要係孫紅雷買衫，佢每攞起一件衫，都望一望鞏俐徵求意見。鞏俐就聲都唔聲，只係點頭微笑，跟住孫紅雷就好放心咁示意店員要買，不過因為size問題，三人都只係買咗兩件總值唔到一百蚊嘅衫。
Cookies噚日出席商台活動，四餅話嚟緊會一改以往俾人感覺太啦啦隊嘅形象，改為以勁歌熱舞迎歌迷，重話會行性感㖭！Cookies話：「比堅尼、熱褲、tubetop就唔少得，所以唔可以肥，𠵱家就要keepfit，所以公司限住我哋食量，如果食得多就扣人工。」男fans知道呢件喜訊，真係開心死！
周杰倫一向有僵直性脊椎炎，不過最近有內地報章指一名周杰倫嘅經理人公司前員工爆料，自稱曾陪周杰倫睇醫生，發現原來佢嘅骨骼有嚴重問題。不過周杰倫經理人楊峻榮前晚話：「這次傳聞倒是十分新鮮，他的骨頭百分之百沒事。況且會陪他看醫生的只有我、他的家人和一位助理，那助理還在公司上班，哪來的前員工呢？」
張可頤噚晚以一身性感低胸晚裝出席有「玩具大王」之稱嘅蔡志明所開設嘅旭日國際周年晚宴。噚日本報報道張可頤夜會四眼新歡，問張可頤該男士係唔係佢嘅真命天子時，佢笑笑口否認，話彼此只係朋友。
為咗支持香港電影工業，政府上年四月開始成立電影貸款保證基金。之前已有四部戲得到貸款保證，最近天下電影、陳奕迅主演嘅《愛作戰》都得到香港上海滙豐銀行提供五百二十萬貸款，基金就承擔一半保證，即係話若電影公司冇錢還，基金都要承擔二百幾萬。
張佩金日前喺上海遇車禍而嚴重受傷，經醫生搶救後已經醒番。噚日張佩金嘅男友Harry話聽醫生講番，張佩金醒咗之後知道自己塊面花咗，有啲唔開心，重成日好恨見Harry。但為免病人唔小心有感染，醫生暫時都唔畀佢哋見面，而張佩金都不時寫話想見男友。馮仁昭希望佢哋快啲好番同見面啦！
