澳洲型男曉治積曼（HughJackman）憑主演全球票房大賣嘅電影《變種特攻》系列，搖身一變成為國際級巨星，𠵱家佢拍親嘅都係大製作，好似五月喺美國及香港同步上映嘅魔幻動作片《狙魔人》，就係一部製作費達九千五百萬美元（約七億四千萬港元）嘅A級製作，呢部亦被視為今年荷李活嘅猛片之一。
身兼《狙》片編、導兩職嘅《盜墓迷城》系列導演史提芬森馬斯（StephenSommers），今次將著名作家BramStoker嘅經典恐怖小說《Dracula》，狙魔博士VanHelsing收服吸血殭屍王德古拉伯爵嘅捉魔經歷搬上銀幕。
扮開狼人嘅曉治今次就轉型做呢個十九世紀嘅驅魔專家，而且今次佢唔單只要搞掂德古拉伯爵，重要對付科學怪人同狼人，將呢幾個家喻戶曉嘅妖魔鬼怪共冶一爐，我羅拉都覺得幾有創意。
而英國靚女姬蒂碧金素爾（KateBeckinsale）就扮演協助曉治降魔伏妖嘅安娜，佢係一個負責追捕德古拉伯爵嘅殭屍獵人家族後裔，再睇埋個造型，姬蒂個角色令我諗起之前佢喺《妖夜尋狼》入面扮嘅殭屍獵人，希望佢唔好咁快就被定型啦！